Home-te'n an zawm tur rules siam a ni tawh - Dr K Beichhua

Social Welfare minister Dr K Bei­chhua chuan, Mizorama ruihhlo ngaite enkawlna hmun (home) hrang hrangte'n an zawm tur dan (accreditation rules) siam a nih tawh thu a sawi.

Thuthar thehdarhtute zawhna chhangin Dr K Beichhua chuan, Mizo­ram Social Defence & Reha­bilitation Board chuan home hrang hrangte'n an zawm tur accreditation rules siam a nih tawh thu a sawi a, "Rules mil hian home hrang hrangte kalpui a ngai dawn. Home tihtàwpsak thlengin sorkarin thuneihna a nei a ni," a ti.

SWD Minister chuan, Seṭhawna ruihhlo ngaite enkawlna hmun Jordan Centre chu chei ṭhat a nih dawn thu sawiin, "A chei ṭhatna atan SEDP aṭangin cheng vbc. 10 kan nei tawh. Tunah hian in 40 a awm mek a, hengte hi chei ṭhat vek a ni dawn," a ti a; chei ṭhat hna thawh zawh a nih chuan kumin April-May velah luah theih an beisei thu a sawi. 

Jordan Centre zauhna atan a bul hnaia ram nei Agriculture leh Horticulture department-te'n an ram LSC chu SWD hnenah an pek tawh thu sawiin K Beichhua chuan, "Social & Rehabilitation Board chuan Jordan Centre hi Mizoram mai ni lo, hmarchhak pumpui hman turin cheng vbc. 15 hû project kan siam. Centre hi a tahtawla zauh zel tum a ni a, mi 1,000 vel leng thei tur siam tum a ni," a ti.

Dr K Beichhua chuan, infrastructure atan Mi­nistry of Social Empo­werment-in sum an pek theih loh thu sawiin, "Kan project hi home chhunga mamawh hrang hrang atana hman turin an pawm," a ti a; cheng vbc. 15 aṭangin nuai 700 vel chu Ministry-in an sanction nghal tur thu amah an hrilh tawh tih a sawi.

SWD Minister sawi danin, Jordan Centre-a awm turte chu a hmun an thlen aṭanga darkar 24-48 chhung vel chu an hriselna endik hmasak vek tur a ni a, chumi hnuah ruihhlo an nghei theihna atan puih an ni ang a, ruihhlo vanga harsatna an neihte laka puih tur niin, a hnuah chuan skill development lam buaipuitir an ni ang.

Jordan Centre-a hian thawktu - doctor, psychologist, an rinna lama pui tur, venhim hna thawk tur leh a dangte mamawh a ni dawn a; chu'ngte chu a theih ang angin sorkar hnathawk sa hman tum a ni a, a theih loh chinah chuan lawmman (honorarium) pein mi dang rawih tum a ni.