Pawl hrang hrang leh ZPM Ṭhalaiin Assam Rifles an dem thu an tarlang

Lengteng bialtu F Rodingliana, minister of state a bial fan lai leh Aizawl pana a lo haw Assam Rifle-te'n an tih din chungchangah pawl hrang hrang leh ZPM Ṭhalaiin thuchhuah siamin, Assam Rifles sipaite chet dan an dem thu leh a mawhphurtute hrem an phût thu an tarlang.

Mizo Zirlai Pawl (MZP) extended OB meeting nimina ṭhukhawm chuan, minister of state F Rodingliana zin haw lam Assam Rifle-te'n an lo dan chungchangah thuchhuah siamin, "Mipuite thlan chhuah, ram hruaitu pawimawh tak Assam Rifle-te'n harsatna an siamsak hi Mizo hnam hmuhsitnaah kan ngai a, tribal hnamte engahmah ngaih lohna a nih avangin hetiang a thlen nawn tawh loh nan MZP chuan Union Home Ministry-ah he thil thlêng hi a thlen dawn a ni," an ti.

MZP chuan minister laka Assam Rif;les-te thil tih chu an hriatthiam loh thu leh an dem thu an tarlang a, "Mizoram ram ralmuang taka Assam Rifle-te chetna chhui chianga, a ṭul anga hmala turin Mizoram sorkar kan ngen a, Armed Forces Special Power Act 1958 (AFSPA) hmanna state pawh ni lo Mizoram chhunga Assam Rifle-te’n minister zahawm tak an lo dang ngawt mai hi enliam mai mai harsa kan ti," an ti a, thuneihna hman sualna awm ngeia an hriat thu leh democracy hnuaia Mizoram mipuiin an aiawha an thlante zah lohnaah an ngaihthu an tarlang.

Minister dang tura thu petu leh harsatna bultumtu chhui chhuak tura thuneitute ngenin MZP chuan, "A kaikuang hi chhui chhuak a, Mizo mipuite leh Assam Rifles-te inkara inhriatthiam lohna thlentu hi a rang lama sawn chhuak vat turin thuneitute kan ngen a, Indo-Myanmar ramria awm kan nih avangin Mizoramah Para Military & Central Forces-te an la awm reng dawn a, Mizo mipuite nen thawhhona ṭha tak awm zel se tih hi kan duh dan a ni," an ti.

Mizoram Industries & Commerce Service Association (MICOSA) chuan, Commerce & Industries minister F Rodingliana official tour programme October 9-17, 2024 chhunga Assam Rifles-ten Kawlbem dai leh Ngopa daiahte lo tidinga check an tum thu leh Seling daiah leh Zemabawk daiah ralthuam chelek chunga an tiding chu tihluihna-a in rikrapnaah an ngaih thu an tarlang a, "Assam Rifles ho chet dan tenawm tak hi democracy zah lohna leh palzutnaah kan ngai. A bik takin minister motor-a India National Flag intar pawh zahna nei miah loa an che hi India Constitution zah lohnaah kan ngai bawk," an ti a, Mizo mipuite Assam Rifle-te lakah an him lo hleah an ngaih thu an sawi.

MICOSA chuan, "Assam Rifles duty, democracy pawh zah lo, India Constitution pawh zah lo, Mizo mipui pawh zah lo bawkte hi na taka an chunga dan anga hrem hi kan phut a, hetiang thil hi a thlen nawn tawh loh nan Mizoram sorkar leh India sorkar hma la turin kan phut tlat a ni," an ti.

ZPM Ṭhalai headquarters chuan thuchhuah siamin, "Minister Pu F Rodingliana convoy vawi eng emaw zat lo tih din a, lo tihbuai hi Mizoram sorkar Constitutional Right tih hminghliauna leh Mizo mipui zah lohna tawpkhawkah kan ngai. Minister official tour nei, kawng laka vawi thum ngawt mai lo ti dinga chhuanlam tling lo tak tak hmanga zawhna hrang hrang lo zawta an lo tikhawtlai leh, boruak chhe zawk thleng palh thei dinhmuna an lo siam hi kan ngai thu tak hle," an ti a, Mizoram sorkar hotute sahimna leh venhimna protocol mai bakah an Constitutional Rights zah lohna leh bawhchhiatnaah an ngaih thu an tarlang.

He thilthleng chungchanga mawhphurtute zawng chhuaka, thil dik lo titute hrem tur leh Mizoram sorkar leh mipui hnenah insawifiahna leh ngaihdam dilna siam tura Assam Rifles an phut thu tarlangin ZPM Ṭhalai chuan, "India rama state ralmuang bera hetiang thil kan tawng ta mai hi pawi kan tiin lungchhiatthlak kan ti tak zet a. Armed Force Special Power Acts (AFSPA) hmanna state ang maia Assam Rifle-te mipui tana harsatna siam zawnga an khawsak zui zel lohna turin Mizoram mipuite pawh ṭangrual zel turin kan sawm a ni," an ti.

Mizoram Chamber of Commerce & Industry pawhin Commerce & Industries Minister laka Assam Rifles-te chet dan chu an hriatthiam loh thu an tarlang a, "Democracy kalphung niin kan hre thei lo. Hetiang khawpa mipui aiawh minister hial chunga hleilenna hi thil dik niin kan hre lo," an ti a, a mawhphurtu a na thei ang bera hrem an phut.