TNAI Mizoram Branch Diamond jubilee lawm

Aizawl, Lunglei leh Kolasib-ah nimin khan Trained Nurses' Association of India (TNAI), Mizoram Branch diamond jubilee lawm a ni a; Aizawlah Health minister Lalrinpuii, Lungleiah Lunglei South bialtu MLA Lalramliana Papuia leh Kolasibah chuan Assembly deputy speaker Lalfamkimate'n an hmanpui.

Aizawlah chuan Synod Conference Centre-ah hun hman niin, Health Minister chuan nurse-te chu thlei bik nei lo leh mahni inphata rawngbawl ṭhin an nih thu sawiin, "Inlungrualna vawng nung zelin, Mizoram leh India ram pawn thleng pawha hnathawk tura thawn chhuah tlak thiamna nei turin ṭan la zel ula, ruihhlo laka Mizoram chhan chhuak tura in dinhmun pawimawh zia ngaihtuah ṭhin ang che u," a ti a, ram leh hnam, harsatna sukiang tura thawhpuiah a sawm a ni.

North-East Region TNAI Hqrs. vice president Cheryl Susan Tada pawhin thu sawiin. nurse-te chu inhlanna leh tumruhna nena an eizawnna kawng zawh turin a chah a; hun kal tawh aṭanga inzir fo ṭhin tur te, an tun hun chu ṭangkai taka hmang tur leh hma lam huna beiseina sang tak nei ṭhin turtein a chah bawk

Lungleiah chuan Convention Centre-ah lawm a ni a; khuallian Lalramliana Papuia chuan, "Khawvela mi hnuaihnung ber aṭanga a lal ber thlenga kan mamawh inang tlang vek chu nurse-te enkawlna a ni a, nurse hna chu indona hmun thleng pawha service ṭul leh pawimawh a ni. Nurse hna hi hna zahawm leh pawimawh tak a nih rualin, a zahawmna vawng him turin thawktute an pawimawh a, mi 99 fak tlak chanchin hi mi pakhat sawisel hlawhin a thai chhe thei a, nurse pakhat hming chhiatnain nurse zawng zawng a tihmingchhe tel thei," a ti.

TNAI Mizoram State Branch diamond jubilee lawmnaah hian Lunglei Municipal Council (LMC)-a executive councillor pahnih - Zorinsanga Hnamte leh Lalhruaitluangi Sailo leh Ward IV councillor R Lalramzauva te, sawm bik sorkar official-te leh trained nurse leh nursing zirlaite an tel.

Kolasiba jubillee hmanpuitu deputy speaker Lalfamkima chuan, nurse hna chu a ropui thu leh a zahawm thu a sawi a, "Nurse-te hi Isua tihdam rawngbawlna hna chhunzawmtu an ni a, Bible zirtirna angin mi chak lo leh damlote hmangaih takin enkawl hna thawk zel ang che u. Nurse-te hi chhung tin leh khawtlangin kan mamawh leh thlamuanpui an nih avangin eizawnna nimai loin, mipui rawngbawlna lian tak a ni a, nursing profession hi khawvelin a mamawhna a sang hle," a ti a, nursing zirlaite chu sorkar hna chauh thlir loa state pawn leh foreign-a kal thei tura inbuatsaih turin a chah a ni.

Trained Nurses' Association of India (TNAI) hi kum 1908-ah din niin, Mizoram State Branch hi August 1964-ah din a ni a; Mizoramah TNAI life member 4,053 an awm mek. Mizoram pumah nurse zirna-in 17 a awm.