Chaw chhun sema harsatna sawifiah

Education Director chuan thuchhuah siamin, primary leh middle school zirlaite hnena chaw chhun (midday meal) sem zirtirtute'n tihtawp an tum chungchanga thil awm dan an sawifiah a, middel school leh primary school zirtirtute'n October 18 aṭanga an sem chhunzawm theih loh tur thu an thlen chu an dinhmun an hriatthiam puiin, pawi an tih thu a tarlang.

An harsatna ber chawhmeh man (material cost) chu January, 2024 aṭanga tun thlenga pek chhuah a nih tawh loh thu tarlangin Education Director chuan, "Cook-cum-helper hlawh pawh thla 4 lai chu pek a ni tawh loa, pawi kan ti hle. Sorkar thar hian cook- cum-helper te dinhmun hriain, thla khata Rs. 1500 an hlawh ṭhin chu Rs. 3000-ah tih san a ni a, heng hlawh thar ang hian April leh May thla hi pek a ni tawh," a ti.

Education Director tarlan danin, harsatna a thlen nachhan her chu fund pek chhuah dan system thar Public Financial Management System (PFMS) hman a ni a, chumi hnuaiah chuan State Link Scheme (SLS) awm lehin account pathum hawn a ni a, chu chu a hran theuhin Finance department, PFMS leh StateTreasury leh central lama PFMS te nen inthlunzawm vek a ngai a, hemi huaipui chhung hi hun a hle.

Tin, PFMS hi thil thar a la nih avangin state PFMS-a thawktute nen inbe rawnin inhai kuak chawp zel ngai a, heng zawng zawngte zawh a nih hnuah central assistance dilna hi thehluh theih a ni chauh a, kum 2023-24 atana 1st installment chu October thla laihawl velah hmuh theih chauh a ni.

Tin, PFMS hi langtlang taka kalpui a nih avangin fund kal dan hi central lama miten an rawn hmu vek thei tawh a, fund neih zawng zawng atanga 75% tal kan hman zawh loh chuan installment dang dil theih a ni lo. Chuvangin, central-in fund a rawn release veleh theih tawpa umzui a ni chung pawhin duh angin hmalak chak a har em em a, hetianga thil tih zung zung theih loh a nih dan hi sikul an thawhpui zirtirtute leh Zoram mipuiten an hriatthiampui a ṭul.

Mizoram sorkarin naupang chawchhun hi a ngaihpawimawh em avang hian, state share pawh advance-in cheng nuai 484.29 chu nimin khan a sanction tawh. Central lamah pawh lam kal intirin bawhzui nghal turin department in hma a la nghal a, rei loteah chinfel thuai beisei a ni

Education Director chuan thawktu zawng zawngte naupangte dinhmun hre renga mahni zawn ṭheuha tlawmngaih chhuaha, a theih ang anga ṭhahnemngai taka hma la chhunzawm zel turin a ngen.