Kohhran leh mipuite duh loh zawng kan tih tawh ṭhinah ngaihdam ka dil - MPCC President

MPCC chuan nimin khan an office-ah chhung inkhawm an hmang a, thusawitu MPCC president Lal Thanzara chuan an party-in kohhran leh mipuite duh loh zawng an lo tih tawh ṭhinah ngaihdam a dil.

Lal Thanzara chuan Congress Party chuan mipuite leh Pathian duhsaknain rorelna an lo chelh tawh ṭhin tih sawiin, "Khang hunlai khan kohhran leh mipuite duh loh zawng kan lo ti tawh ṭhin a, chungah chuan ngaihdam ka dil duh a ni. Congress hi BJP chakna hmangin a la orkar ve ngai loa, vawiin nia kan sorkar erawh hi chuan BJP chakna hmang an ni a, inthlannaa an sum hman dan aṭang khan a hriat theih," a ti.

Sorkar mek sawisel fo a chakawm loh tih sawiin MPCC President chuan, "A pawng a puia sawisel hi a puitlin loh thlak a ni. Amaherawh chu, duhkhawp lohna a len em avang hian sawi a ngai leh ṭhin.Vawiin niah hian kan sorkar mek hi kan beisei ang an nih loh avang hian thingtlang lama kan kuthnathawktu te leh Zoram kohhran mipuite Congress Party aṭanga ram siamtha turin ka sawm duh a ni," a ti a, Congress chu sakhaw zalenna duhtu paty an nih thu a sawi.

ZPM President chuan Assam Riffle Biak-In hmun chhuhsak an tum ngai loh thu a sawi tih chanchinbuah a lo hmuh thu sawiin Lal Thanzara chuan, "Thudik a nih chuan ka lawm takzet a ni. Hetih lai hian Assam Riffles Commandant-in AR kohhran upate hnena biak-in chhuahsan nana an pek te, AR kohhranten tawngtaina thupui a an hman te kha kha thudik a ni em kan hre duh a ni," a ti.

MPCC President chuan minister F Rodingliana chu a zinnaah Assam Rifle-te'n hmun thumah tidingin an tibuai tih sawiin, "Minister hian national flag a tar a, pilot a nei a, amah zuitu a nei bawk. Chuti chunga mipuiin kan thlan lal kan minister, Assam Riffle-te'n zah lo taka check tuma an lo tibuai hi a lungchhiat thlak kan ti a, kan dem a ni. He thil thleng hi rang takin a chhan leh a vang chhuichhuak se, hma la se kan duh," a ti a, Assam Riffle hotute pawh minister an tibuai hi hekna leh thildang a awm a nih chuan mipui hriatah puangzar tura an phut thu a sawi.