Mizorama rotling pawimawh zawng zawng MNF kut chhuah deuh vek a ni - MNF GS

MNF chuan nimin khan an party pisa-ah chhung inkhawm an hmang a, thusawitu MNF general secretary TJ Lalnuntluanga, ex. minister chuan Mizorama rotling pawimawh zawng zawng chu MNF kut chhuat deuh vek a nih thu a sawi.

TJ Lalnuntluanga chuan Aizawl leh district khawpui zawng zawnga hmasawnna hnathawh tam ber chu MNF sorkar kut chhuak nia sawiin, "Aizawl khawpui hmel lo danglam ta viau mai te, thingtlang khaw chengker ber thlenga inkalpawhna kawng aṭangte hian kum 40 chhunga kan hruaitute kha awm mai mai loin, hna an lo thawk tih mipuiin an hriat a ṭul," a ti.

Tuna MNF elected OB-te chu Mizoram tan sulhnu nei ṭha an nih thu sawiin MNF GS chuan, "Party dang hruaitute nen chuan khaikhin rual an ni lo. MNF hmabak chu a eng thar hle. Congress ni lo, MNF ni lo thla 10 lek sorkarah hian party ngaihsak ve lo leh neutral mipui an beidawng nasa tawh," a ti a, ZPM chu mi an sawisel ṭhin anga sawisel an hlawh mek thu a sawi.

TJ Lalnuntluanga chuan kalphung anga kan neih MLA term hnih chhung tih chu a inthlak tawh tih sawiin, "Pathian zarah kan tho chhuak leh thuai ang. Kan sorkar leh chuan kan kan sakhuana leh Kristiannate champion puiin, ṭhalaite eizawnna lam nasa takin kan ngaihtuah ang. Kan sorkar lai khan Covid vangin kum hnih leh a chanve hnathawk hlei thei loin kan awm a, khati chung khan thil tam tak kan ti tho a, kan hmalak mek tam tak a hlawhtling hman ta lo a ni," a ti.