State sorkar nena thawhhona ṭha nei VC thlang tura kan inbuatsaih a ṭul - K Sapdanga

Nimin khan minister K Sapdanga chuan Tuirial bial chhung khaw hrang hrang Lungdai, Serkhan, Nisapui tlangdung khuate a tlawh a, state sorkar nena thawhhona ṭha nei VC thlang tura inbuatsaih a ṭul thu a sawi.

K Sapdanga chuan nakkum kum tir maiah village council kan inthlang dawn tih sawiin, "VC-te hi khawtlang tana mi pawimawh ber an ni a, sorkarin hmasawnna hna a thawh kawngah te, central scheme hrang hrangahte pawh bialtu MLA aia pawimawh zawkna an nei fo a ni. Khawtlang inrelbawlna tel lovin ram hian hma a sawn ngawt thei lova, ramin khawtlang a changkan san ngawt thei hek lo," a ti.

Khawtlang hmasawnna hian ram a ti hmasawn mai chauh zawk a ni tih sawiin K Sapdanga chuan, "Chuvangin state sorkar nena thawhhona ṭha neia, kal dun tur VC ṭha zawk nei turin kan inbuatsaih chhoh a ṭul tak zet. Tuirial bial mipuite hi kuthnathawk nasa khua, khaw taima bial in ni a, ZPM sorkarin a ti tak tak turte tan Bana Kaih Policy kan nei a, thlai thar lei tur chi 4 kan chhawp chhuak bawk," a ti a, sorkar policy-te hi Tuirial bialin hmasawnna atan an hmang ngei dawna a lan thu a sawi.

Tuirial bial chhunga khaw hrang hrangten hian minister K Sapdanga hnenah hian an khaw mamawhte an lo thlen a, a theih anga a bawhzui tur thu a hrilh.