Mi 1,30,748 hnenah NLUP sem tawh

Congress party kaihhruai Mizoram sorkar flagship programme, NLUP hnuaiah first phase aṭanga fourth phase thlenga ṭanpuina pek tura ruahman mi 1,35,000 zinga a dawng tura thlan zat chu mi 1,30,748 an ni.

NLUP hi first phase sem zawh tawh a ni a, phase dang zawng erawh la sem zawh loh a ni.

NLUP Implementing Board (NIB) aṭang thu dawn danin, NLUP first phase-ah ṭanpuina pek tur ang pek zawh a ni tawh a, mi 45,139-te ṭanpuina pek tura ruahmanah mi 43,961 hnenah ṭanpuina pek a ni. Second phase-ah chuan ṭanpuina pe vek turin mi 45,000 ruahman a ni a, mahse ruahman aia tam, mi 45,118 hnenah ṭanpuina pek a ni. Second phase-ah hian line department pangain an sem zo tawh a, department paliin an la sem zo lo thung.

Third installment-ah mi 29,861 pek tura ruahman a nih laiin, a dawng turin mi 28,167 thlan an ni a; fouth phase-ah mi 15,000 pek tura ruahman a nih laiin, dawng tur thlan zat erawh chu mi 13,502 an ni. Third phase-ah hian ṭanpuina sem chhuah ṭan a ni tawh a, mahse, ṭanpuina dawng turte'n an la dawng kim lo vek. Fourth phase erawh chu an la sem chhuak lo thung.

NIB secretary James Lalrinchhana'n Vanglaini palai zawhna chhanga a sawi danin, Mizorama district parukah village council leh local council inthlan avangin NLUP sem chawlhsan rih a ni a, inthlan ve lohna Saiha leh Lawngtlai district-ahte chuan a remchang anga sem chhunzawm zel a nih thu a sawi.

James Lalrinchhana chuan, NLUP chu first phase-ah beneficiary-te'n an dawn tur ang an dawng kim vek tawh tih a sawi a, "Second phase-ah chuan line department pakua zinga pangain an sem kim tawh a, department paliin an la sem zo lo deuh," a ti a; third phase pawh an sem nual tawh tih a sawi.

NLUP ṭanpuina sem zel turah sum lamah harsatna a awm loh thu sawiin, James Lalrinchhana chuan, "Central-in a tih tur a ti tawh a, state sorkarin a phak ang zelin a sem chho a ni," a ti.