KHAWTHLIR

Students’ Self-Support Union (SSU)-in Mizoram Information Directory 2020 an buatsaih chu nimin khan Aizawl Press Club-ah Information & Public Relations minister Lalruatkima'n a tlangzarh. Minister chuan, Directory chu Mizoram mipui leh sorkar office-te'n ṭangkai taka an hman a duhsak thu a sawi.

Lawngtlai District Hospital laboratory-ah a vawi khat nan September 7, Thawhṭanni khan True­NAT True­lab Quattro hmangin swab sample endik ṭan a ni a, test hmasak ber pathumte'n Covid-19 an vei lo tih hmuh a ni.

State Referral Hospital-ah nimin khan Covid-19 vei mi pali leh rinhlelh thilah mi pakhat dah luh a ni a, mi 57 enkawl mek niin, mipa 43 leh hmeichhia 14, kum 5-78 inkar an ni. Hripui veite chu SICU-ah pakhat leh Isolation ward-ah mi 56 an awm a, dinhmun ṭha lo an awm lo a, an chhuah theih vat beisei a nih thu, nimina SRH-ZMC Bulletin chuan a tarlang.

Mizoram sorkar 

chuan Covid-19 donaa thawktu local/village level task force hrang hrang hnenah August 24, 2020 thleng khan cheng nuai 216 a pe tawh. Sum hi DC-te kaltlangin task force-te hnenah pek ṭhin a ni.

Nimin khan dy. chief minister Tawnluia hoin minister 11 leh Lunglei HPC Vice Chairman chuan Covid-19 dona atan August thla hlawh basic  pay aṭangin 50% (Rs. 40,000) ṭheuh Chief Ministers' Relief Fund-ah an thawh.

Shyama Prasad Mukherji Rurban Mission (SPMRM) kaltlangin Khawzawl urban cluster khaw pakua - Arro, Tualpui, Chawngtlai, Neihdawn, Hmunchêng, Vankal, Ngàizáwl, Khualen leh Tualte-a khuai khawitu mi 48 hnenah nimin khan khuai báwm 336 sem a ni. Khawzawl BDO Dr Saithangpuia chuan, bottling & packag­ing leh labelling awm thlapa Khawzawl cluster khawizu thar chhuahte khawpui lian zawk thlenga hralh theih tura ruahman mek a nih thu a sawi.