Lal Thanhawla'n Congress chet that a ring Zorama'n Cong aia an chet that zawk a ring

Chief minister Lal Thanhawl­a chuan, saipui kal lai chu an la bauh din a rin loh thu a sawi. MNF president Zoramthanga chuan village council-ah aiin local council-ah an chet ṭhat zawk a rin thu a sawi bawk.

Nimina Zarkawt Polling Station-a Zarkawt LC in­thlana vote a thlak zawha thuthar thehdarhtute'n an kawmnaah CM Lal Thanhawla chuan, tun ṭum inthlanah pawh saipui kal lai chu an la bauh din a rin loh thu leh, Congress party-in sor­karna an lak tam zawk a beisei thu a sawi a; mi pangngai tan chuan Congress candidate-te vote loh chhan tur a awm lo niin a sawi.

MNF president Zoramthanga pawhin Ramhlun Venglai Polling Station-a vote a thlak zawha zawhna chhangin, VC-ah aiin LC-ah sorkarna an lak tam zawk a beisei thu sawiin, Aizawl khawpui páwn lama V/C-ah chuan rorel lai pawl ni lo tan tlin tam a harsat thu a sawi a, "Aizawlah chuan Congress party thlipui a tleh lai pawhin MNF candidate-te an tling tam zawk a, sorkar kan siam tam zawk bawk a. Tunah phei chuan Congress sorkar ninna a nasa tawh a, a hma aia nasaa kan chak zawk a rinawm," a ti.

Zoramthanga chuan, chief minister a nih laia V/C inthlan dawnah MNF candidate-te thlan loh chu balṭin mawng pawpa tui chhûn khah tum ang nia a sawi chungchang zawhna chhangin, an sorkar laiin sorkar zár zo tur a tam a, chuvang chuan rorel lai pawl thlan tlin loh chu ṭin mawng pawpa tui chhûn khah tum ang a nih thu a sawi niin a sawi a; tunah erawh chuan sorkarin sum a neih loh avangin rorel lai pawl kher thlan tlinin awmzia a nei tawh lo niin a sawi bawk.