Chaw ngheite'n taksaah harsatna an nei ṭan
April 27, 2015 aṭanga chaw nghei tawh, RMSA hnuaia laboratory attendant leh clerk-te leh SCERT Guidance and Councelling-a thawkte chuan nimin thleng khan PRISM office-ah chaw an la nghei chhunzawm zel a; an zinga mi ṭhenkhat chuan taksaah harsatna an tawk ṭan mek.
Sorkarin April 1, 2015 aṭanga an hna aṭanga a bàn tâk, RMSA laboratory attendant leh clerk-te leh SCERT Guidance and Counselling-a thawk mi 366-te aiawha chaw nghei mek hi mi 43 an ni a; niminah pawh village council leh local council-ah vote an thlak lo a ni.
Laboratory attendant leh clerk-te leh SCERT Guidance and Councelling-a thawkte zinga an convener R Lalzirliana chuan, chaw nghei zinga mi pathum an taksa a chauh tawh avanga Nilainia Aizawl Civil Hospital panpuite bak chu nimin lamah damdawi-ina hruai an awm loh thu Vanglaini palai a hrilh.
R Lalzirliana chuan, chaw ngheite chu ni tin doctor-te'n kal chilhin an endik ṭhin thu sawiin, "Mipa pakhat chu a chauh zual deuh avangin doctor-te'n chaw nghei titawp turin an ti a; tihtawp leh tihtawp loha thutlukna chu ama kutah kan dah," a ti. Drip khai tura tih mi pathum zingah pakhat chiah an la khaisak thu a sawi bawk.