MLA pahnihin an model village an tlawh

Assembly speaker Hiphei chuan nimin khan a bial, Palak biala model village atana a thlan Serkawr khuaah model village atana puan lawmna hun a hmanpui.

Lawngtlai West bialtu MLA, minister C Ngunlianchunga pawhin a bial chhunga model village atana a thlan Vaṭhuampui chu Nilaini khan a tlawh a, hmasawnna hnathawh hrang hrangte a enfiah.

Hiphei chuan, Mara ram hmasawnna lamtluang zawha hma lam a pan zelna tur chu Serkawr khua aṭanga a inṭan a rin thu sawiin, Serkawr khaw mipuite chu an khua chu Mara ram tana Jerusalem a ni tih hre reng tur leh, kawng engkima khaw dangte entawn tlaka nung turin a chah.

Hiphei ṭawiawmtu MADC CEM RT Zachono pawhin Serkawr khaw mipuite chu a lawmpui thu sawiin, model village tih tlaka ṭan la turin a fuih a ni.

Minister C Ngunlianchunga chuan, Mizoram sorkarin thing­tlang kilkhâwr zawkte a ngaihthah lo tih sawiin, "Hmun kilkhawr zawka awmte'n khaw êng an hmuh theihna atan sorkarin châwl loin hna a thawk reng a, hmasawnna hnate hi a rawn kal zel dawn a, ṭha taka thawh a nih theihna atan mipuite ṭawiawmna a pawimawh hle," a ti.

C Ngunlianchunga chuan, Vaṭhuampui khaw mite chu hmasawnna hmel thar an hmuhah a lawmpui thu a hrilh a, eizawnna lama hmasawn zel tura theihtawp chhuah zel turin a fuih.

Lawngtlai East bialtu MLA H Zothangliana pawhin Vaṭhuampui mipuite chu hmasawnna an hmuh tam vanga a lawmpui thu sawiin, "Khaw vannei, remchanna ngah leh hmasawn zel tura dinhmun ṭhaa ding in nihna hi hmang zui thiam ang che u," a ti.

MLA pahnihte hi Lawngtlai DC J Hmingthanmawia, DRDA project director Dolianbuaia leh LADC hotute'n an ṭawiawm a ni.

Vathuampui khua hi Lawngtlai aṭanga chhim thlang lam km. 148-a hlaa awm a ni a, chhungkua 246 awmin, mihring 1250 vel an cheng mek a ni.