May Day - International Labour Day

Vawiin May 1 hi khaw­vel pum huapa kut hnathawktu (labour)-te ni, International Labour Day a ni a, May Day tih a ni bawk. International Labour Day / International Workers' Day hi May 1, 1886-a Hay Market, Chicago, USA-a thil thleng hriatreng nan kum tin hman ṭhin a ni.

Kum 1886 khan Hay Market-a kuthnathawktute chuan ni khat chhunga darkar riat hna thawh ngiat­in nawrh an huaihawt a, hetih hun lai hian hna hahthlak leh him lo tak tak ni khatah darkar 10-16 an thawk ṭhin. Ni khata darkar riat chhung thawh ngiatin nawrh an huaihawt a; police leh a huaihawtute intibuaiin, police-in silai an hmetpuak a, mi tam tak an thi a ni.

Hna thawktute'n an beih fê hnuah, kum 1884-a Chicago-a American Federation of Labor-in National Convention an neih chuan ni khata darkar riat hna thawh a phalsak ta a; Hay Market-a thite hriatreng nan leh ni khata darkar riat hna thawh phalsak an nih lawm nan May Day chu kum tin an hmang ta a ni.

Khawvel pum huapa hna thawktute hamṭhatna ngaihtuah­tu atan United Nations hnuai­ah International Labour Organization (ILO) din a ni a; ILO-ah hian UN member 193 aṭangin member 185 an awm mek. ILO hian hnam leh hnam inkara palai hna a thawh ṭhat vang te, hna thawktute tana a hmalakna leh ram tam tak tan ṭanpuina a pek ṭhat avangin kum 1969 khan Nobel Peace Prize a dawng a ni.