ASF laka hima tur ngaihtuah

Nimin khan Aizawl District Level Coordination Committee on African Swine Fever (ASF) chu an chairman R Lalramnghaka, bawrh­sap hoin DC conference hall-ah an ṭhu a, ASF laka Aizawl district him theih dan tur an ngaihtuah.

R Lalramnghaka chuan, khawvel hmun hrang hrang tibuaitu ASF chu India ramah a luh ve tawh avang leh Mizoram ṭhenawm state-ah pawh vawk tam tak a suat tawh avangin Mizoramah a luh lohna turin theihtawpa ṭan lâk a ngaih thu a sawi a, "ASF hian China ramah vawk nuai 400 a suat tawh a, India ramah lo lut mekin, hmarchhakah Assam leh Arunachal Pradesh-ah vawk 20,000 chuang a suat tawh. Meghalaya-ah pawh kumin August khan ASF vang ni ngei tura ngaihin vawk an thi nual a ni," a ti.

Committee member secretary Dr Lal­nghinglova chuan ASF chungchang sawifiahin, "He natna kai vawkte chu an thi ngei ngei a, a enkawlna damdawi leh hri venna vaccine a awm lo," a ti a, Mizo­rama a luh loh nan invèn a pawimawh tak zet thu a sawi.

Committee chuan state páwn aṭanga frozen pork la luta hralh ṭhin te, a leitute leh páwn lam aṭanga vawk leh vawksa 

aṭanga thil siam dangte la luta, zuar leh lei ṭhin zawng zawng chu Mizoram himna atan ti tawh lo turin an ngen a ni.