Hnam lam thiam ber Chanmari West Branch YMA: Kan culture hian kan hnukah min man tlata kristianna nen inmil takin kalpui ang u - CM

Chief minister Lalduhoma chuan, Mizo hnam zia chhawmnung zel turin Mizo mipui a chah a, "Kan culture hian kan hnukah min man tlat a, kan ngaina ṭheuh a ni. Kristianna nen inmil takin i kalpui tlat ang u," a ti.

Art & Culture department leh Central YMA-te ṭangkawp buatsaih Chief Minister's Running Trophy vawi 13-na 'Hnam lam intihsiak' chu October 19, Inrinni khan Dawrpui Multipurpose Centre-ah khar a ni a; intihsiakah hian khuallam leh cheraw-ah Branch YMA 42 an inel a, a pumpuiah Chanmari West Branch YMA pakhatna an ni.

Hnam lam intihsiak kharna hun hmanpuitu chief minister Lalduhoma chuan, Mizo hnam zia leh tihphungte chhawmnun zel a ṭul thu a sawi a, "Hnam dangte laka hnam dang min nih tirtu chu kan zia, kan ṭawng, kan zai leh lam, kan nunphung leh kan tihdan hrang hrangte hi an ni a, chu chu Pathian min pek a ni. Mihring hi awm reng mah ila kan hnam ziate hi a bo si chuan hnam bo kan ni mai ang. Chuvang chuan kan tihdan ṭha tinrengte hi kan chhawm nung zel tur a ni a, kan zahpui tur a ni lo," a ti.

Kristiannain Mizo hnam zia tam tak a thlak tawh tih sawiin Lalduhoma chuan, "Tunhma deuh chuan Mizo irawm chhuak hlate biak-inah kan sa duh meuh lo a, khuang lakluh takngial pawh kan rem ti lo a, Mizo incheiin kan inchei lut ngam mang lo. Vawiinah erawh chuan chu'ngte chu a lo bo ta tial tial a, kan kristiannaah kan hnam zia a lo leng chho tial tial ta. Kan culture hian kan hnukah min man tlat a, kan ngaina ṭheuh a ni. Kristianna nen inmil takin i kalpui tlat ang u," a ti a, ram dangah pawh hnam ze mila kristianna an kalpuina hmun apiangah kohhran a ngheh ṭhin thu a sawi.

Chief Minister chuan Mizo culture hian khawvel zau zawk a thleng chho zel tih sawiin, "Khawvelin min hmelhriat tial tial a, nasa lehzualin i uar deuh deuh ang u," a ti a, hnam lam intihsiak vawi 13 buatsaih a nih theih nana Art & Culture department leh Central YMA-te hmalakna lawmawm a tih thu a sawi.

Khualzahawm Art & Culture minister C Lalsawivunga pawhin thu sawiin, hnam changkangten hmasawnna leh an hnamzia an kal kawptir thiam thu leh hmasawnna ke pen nghet an neih ṭhin thu a sawi a, "Kan kristianna leh kan hnam ze ṭhate keng tlat chungin hma kan sawn tur a ni a, chu chu hmasawnna dik chu a ni," a ti a, hnamzia ngaihhlut tlat a ṭul thu a sawi a ni.

Chief Minister's Running Trophy vawi 13-na kharna inkhawm hi Art & Culture director Carol VLMS Dawngkimi'n a kaihruai a; CYMA president Lalhmachhuana, treasurer Roneihthanga leh Cultural Sub-Committee secretary C Lalthlamuanate'n thu an sawi.