Kan ram dam lohna pakhat chu rinawmna kan hloh ṭhin hi a ni - K Sapdanga

Home minister K Sapdanga chuan October 19, Inrinni khan Kawnpui, Hortoki, Mualkhang, Khamrang leh Kawnpui Police Out Post-te a tlawh a, Mizoram dam lohna pakhat chu rinawmna hloh ṭhin vang a nih thu a sawi.

Tunhma chuan Zofate hi hnam rinawm, kawngka kalhna atan pawha thingfak hmang mai ṭhin an nih thu sawiin K Sapdanga chuan, "Khawvel hmasawnna leh changkannain min luh chhuah hnu hian sorkar pisa-ah te, ram enkawlna kawngah te, khawtlang inrelbawlnaahte leh mahni hna zawn ṭheuhahte rin­awm­­nain hmun a chang tlem ta hle a, ṭan lak kan ngai. Kan ram leh hnam dam lohna pakhat chu rinawmna kan hloh ṭhin hi a ni," a ti.

Home Minister chuan kohhran huanga rinawm thei, sorkar hna leh sorkar thil a niha inthlahdah leh ṭhin an awm tih sawiin, "A pawi tak zet. Kalphung thar mipui sorkar chuan 'Ram rorelnaa Pathian ram tundin' kan tum avangin mipuite pawhin kan ni tin nun leh midangten min hmuh phak loh chinah pawh Mizo kan nih ang leh kristian kan nih angin rinawmna kan vawng tlat tur a ni," a ti a, rinawmna chu chhungkua, khawtlang, ram leh hnam tan tan malsawmna niin, chu malsawmna dawngtu tur pawh chu mahni tho a nih thu a sawi.

Sorkarna an chelh hnuin Home department chhungkuaah pawh ṭan an la nasa hle tih sawiin Home Minister chuan, "Kalphung hluia hun rei tak kan lo kal tawh avangin department chhungah pawh siamṭhat ngai thil tam tak a awm a, kan insiam rem mek a ni. Rinawm lohna ram leh hnam tan a pawi em em a, mipuiin an tuar ṭhin. Tin, mi fel tak tak karah mi inthlahdahte avangin kan lo hmingṭhat tawhnate pawh thai rehin a awm phah ṭhin. Heng mi inthlahdah, mi rinawm lote hi sorkar chuan a thian thianghlim nual tawh a, an chungah thununna kan lek zel dawn," a ti bawk.