F Rodingliana laka AR-te chet danah MBJP-in MoS for Home lehkha an thawn

Mizoram BJP president Vanlalhmuaka leh BJP Legislature Party leader Dr K Beichhua chuan minister of state F Rodingliana laka Assam Rifle-te chet dan chungchangah Union minister of state for Home Nityanand Rai hnenah lehkha an thawn.

MBJP hruaitute chuan October 12, 2024 khan F Rodingliana hi Kawlbema vantlang inkhawma a kal tur chu Assam Rifles mi leh sa pakhat, zurui ni ngeia hriatin zahna nei miah loa a lo tih din thu tarlangin, "AR mi leh sa hian national flag zahna pawh a nei lo, motor darthlalangte a chum a ni. A hnuah Mizoram Police-in thu zawhfiah atan an la a, thubuai siam sak loin an chhuah leh," an ti.

MBJP hruaitute chuan Assam Rifle-te hian F Rodingliana hi October 14-ah Ngopaah leh October 17-ah Aizawl daiah an lo tiding leh tih Union MoS for Home hi an hriattir.

Union MoS for Home hnenah hian MBJP hruaitute chuan, thil dik lo a awm a nih chuan mipui thlan lal laka mawi lo taka chetu lakah hian rorelna dik a awm theihna atan hremna lekkawh ngei tura an duhthu thlenin, mipui thlan lalte chunga zahna lantir tura Mizorama Assam Rifles awmte hriatttir turin an ngen nghal bawk.