Oct. 23 aṭangin sumdawng lirtheite an tlan dawn lo: Mipui tana lungawi lohna lantir tur kan ni - MCVC

Mizoram Commercial Vehicle Union (MCVU) chuan thuchhuah siamin, tuialhthei man tihhniam a nih loh avangin October 23, zing dar 6 aṭangin tiamchin awm loin an tlan dawn lo tih an tarlang a, "Mipui tana lungawi lohna lantir tur kan ni," an ti.

MCVU chuan Mizoramah tuialhthei man a san avanga mipuiten an tawrhna tur pumpelh theihna atana Mizoram sorkarah tuialhthei man tihniam tura an dil tawh chu Cabinet meeting-in rem a ti lo tih tarlangin, "October 14, 2024-a lungawi lohna lantir kan tum chungchangah NGOCC-te nen kan inkawm a ni," an ti a, Mizoram nu leh pa nih tling NGOCC-te ngenna chu zahawm an tih avangin lungawi lohna lantir an ṭhulh tih an tarlang.

MCVU tarlan danin, tuialhthei man Rs. 5 ve vea tihniam tura an lo dilna chu NGOCC-te'n Rs. 3 ve vea tihniam tura an dil leh, September 1, 2024 aṭanga tuialhthei man to tura a tihna order sut lehna (revoke order) a chhuah tur thu Chief Minister-in an hnena a sawi chu pawm ve turin an ngen a ni.

October 11 khan Chief Minister an hmu leh a, hemi ṭum hian tuialhthei man sangah revoke order a tih chhuah tawh thu te, October 16-ah Cabinet meeting a koh thute leh tuialhthei man tihhniam a nih ngei a beisei thu a lo hrilh bakah, ni rei loteah Cabinet meeting a awm dawn avangin chu tal chu lo nghak hram tura a tih angin an pawm a ni.

Mizoram pumah kawng a chhiat em em avangin khaw tam takah maxicab service pawh an tlan thei lo nual tih tarlangin MCVU chuan, "Ei leh bar nitin mamawh phurtu truck-te pawh kawnglaiah an tluin an chhe nasa em em a ni. Mizoram PWD kawng chan bikte chu Mizoram sorkarin an siamṭhat thuai kan phut a, company-te'n an siam pawh siam ṭha thuai tura kan ngennain awmzia a nei tawh lo," an ti.

MCVU chuan October 19, Inrinnia an ṭhutkhawmnaah Chief Minister-in a thuphunga NGOCC leh MCVU-te a tiam tawh tuialhthei man tihhniam tura a lo hrilh hnua Cabinet meeting-in a ngaia kaltlang leh tihhniam loh an rel tak avangin commercial vehicle zawng zawngte October 23 zing dar 6 aṭanga tiam chin awm loa ding tura an rel thu tarlangin, Zoram mipuite chu an tana lungawi lohna lantir tur an ni tih hria a, thlawp ṭheuh turin an ngen.