Eirukna do tur chuan mamawh tih tlem a ngai - Minister Lalthansanga

November 5, 2024-a Sinlung Hills Council (SHC) inthlan lo awm tur atan ZPM leh HPC ṭang­kawp chuan campaign beihpui an thlak mek a, October 19, Inrinnia Suang­puilawn, Sailutar leh Ratu khuaa campaign-a kal minister Lalthansanga chuan eirukna do tur chuan mamawh tih tlem a ngai thu a sawi.

Lalthansanga chuan ZPM chuan ram rorelnaa Pathian ram tundin an tlangaupui thu sawiin, "SHC-ah pawh hian Pathian ram tundin hi kan tihmakmawh a ni. Chung lam malsawm tlak leh hriatpui tlaka hna kan thawh hi a pawimawh hle. Eirukna do dawn chuan kan mamawh kan tih tlem a ngai a, mihringin duh leh mamawh kan ngah lutuk chuan, eirukna leh hlemhletna laka fihlim a har ṭhin a ni," a ti.

Hun eng emaw lai khan kan ramah chi bing inthliarna a lo awm tawh ṭhin tih sawiin Lalthansanga chuan, "Ralthuam lek ngai hial khawpin Sinlung bial mipuite ensan kan lo ni ṭhin a, tawngkam duhawm lo tak 'Zangkhaw bungbut hnan tlang dung' ti a sawi kan lo ni hial ṭhin a ni," a ti a, mipui rilruah nghawng duhawm lo tak neiin, ensan bik leh hawisan bik tlangdung nia inngaihna lian tak a lo awm tak thu a sawi.

Lalthansanga chuan ensan bik leh hawisan bik nia in ngaihna atan SHC mipuite chhan chhuak turin kalphung thar mipui sorkarah beiseina thar a piang ta tih sawiin, "Kawng hrang hranga SHC mipuite dinhmun chawi kang tur leh leirem in lo rah theihna turin Pu Lalduhoma kaihhruai ZPM sorkar chu a in hawng zau hle. Sorkar hmasate hun laia zangkhaw bungbut hnan tia sawi thin tlang dung tan hian khua a var ve tawh dawn," a ti.

Lalthansanga chuan politics-ah nasa takin eptuten ZPM an bei mek nia sawiin, "Tunlai khawvel thiamna sang tawhah mi ṭhenkhat chuan kalphung hlui leh thu belhchian dawl tawk lo hmangin mipui rilru kaihhruai an tum ṭhin. Media a chak tawh a, mipui pawhin thu dik leh dik lo chik hmasak nachang kan hre zel tawh. Thudik tawk lo hmanga in beih chu rei loteah mahni mawnghlimna mai a lo chang ṭhin," a ti a, politics khelh danah fimkhur tlan a ngaih tawh thu a sawi.

ZPM thuchhuah tarlan danin, Lalthansanga hian Ratu khua aṭangin ZPM-ah mi 127 a lawmlut nghal.