Mi harsatna sukiang turin hmasialna leh chapona dah bo fo a ṭul - B Lalchhanzova

Eye Care Hospital, Aizawl chuan October 19, Inrinni khan an conference hall-ah silver jubilee an lawm a; bialtu MLA B Lalchhanzova, minister of state-in hmanpuiin, mi harsatna sukiang turin mahni hmasialna leh chapona dah bo fo a ṭul thu a sawi.

B Lalchhanzova chuan, mipui rawngbawl nana thiamna bik neite chu sorkar hmanraw ṭangkai tak an nih thu leh Eye Care Hospital-a thawktute inpekna fakawm a tih thu a sawi a, "Mipui min mamawhtute leh mi harsa zawkte ban phaka awm hi rawngbawlna pawimawh berte zinga mi a ni. Min mamawhtute harsatna sukiang theitu ni tura kan thiamna leh theihnate hman ṭhin a ṭul a, hemi kawngah hian mahni hmasialna leh chaponate dah bo fo a ṭul," a ti.

Mizoram tihmasawn turin mahni theihna zawnah ṭangkai tum ṭheuh tura mitin chahin B Lalchhanzova chuan, "Mithiam leh mi hmatlak dapchhuah leh thawhhopui thiam chu sorkar mawhphurna pawimawh tak a ni," a ti a; Eye Care Hospital tihchangtlun nana third floor siam thar hawngin, jubillee souvineer a tlangzarh nghal bawk.

He hun hi Eye Care Hospital Ophthalmologist consultant Dr David L Khiangte-in a kaihruai a; khualzahawm Mizoram State Medical Association president Dr Lalbiakkima leh Global Eye Hospital, Kolkata director Dr Aniruddha Maiti bakah, Eye Care Hospital managing director Dr KL Remsanga-ten thu an sawi.

Civil Hospital, Aizawl, Zoram Medical College, Synod Hospital, Durtlang, Agartala Govt. Medical College, Global Eye Hospital, Kolkata, Chandraprabha Eye Hospital, Jorhat leh Amulya Jyoti Eye Foundation, Kolkata aṭanga mithiamten mit natna leh a enkawl dan hrang hrang thupuia hmanga an thu sawite an zirho a ni.

Eye Care Hospital (Eye Care Centre tia hriat) hi August 1, 1999-ah din a ni a, member pali awmna Board of Directors-in a enkawl. Thawktu eye surgeon pahnih, staff nurse pathum, optometrist panga, IV grade pahnih, optician pathum, administrative staff pali, Mizoram pawn aṭanga rawn vil tu doctor (visiting surgeon) pali leh B.Sc. optometrist intern pali an awm mek a ni.