Saitual district-ah RD scheme hnuaia hmalaknate endik dawn

Saitual district bawrhsap Dr Lalngura Tlau hoin October 18, 2024 khan DC conference hall-ah Ministry of Rural Development hnuaia scheme hrang hrang kaltlanga hnathawh mekte endik tura sorkar laipui tirh National Level Monitoring team-te an ṭhukhawm a, Saitual an awm chhunga an tlawh tur khuate chungchang an sawiho.

Dr Lalngura Tlau chuan, National Level Monitoring team-te chu an awm chhunga hun hlawk thlak tak hmang turin duhsakna a hlan a, khaw hrang hrang an tlawhkual hnuah Saitualah lo let lehin an thil zirte sawihina hun an neih leh theih a beisei thu a sawi.

National Level Monitoring aiawh Anil Sharma pawhin thu sawiin, National Level Monitoring (NLM)-te chu Ministry of Rural Development-in scheme hrang hrang hnuaia hnathawh mekte endik tura a rawn tirh an nih thu leh sorkar chuan mipuiten hamṭhatna an dawn theih nan theihtawp chhuahin hma a lak thu a tarlang.

NLM team-te hian Saitual district-a Phullen, Thanglailung, Luangpawn, Ngopa, Hliappui, Pawlrang, Buhban, Dilkhan, Lungpher leh Sihfa khuate an tlawh dawn a; Rural Development hnuaia scheme hrang hrang - MGNREGA, DAY-NRLM, NSAP, PMAY-G, DDU-GKY, SAGY, PMGSY, PMKSY, SVAMITVA, DILRMP, RSETI leh Panchayat basic verification-te kalpui a nih dan an endik dawn a ni.