Solar park siam turah dan leh hrai zawm a ni dawn - HPC Vice Chairman

Lunglei High Powered Committee (HPC) vice chairman V Malsawmtluanga, MLA hoin October 19, Inrinni khan Project Save Tlawng hruaituten HPC conference hall-ah Lunglei district-a solar park siam tura hmalakna an sawiho a; MLA chuan, solar park siam tura hmalaknaah kim taka dan leh hrai zawm a nih dawn thu a sawi.

V Malsawmtluanga chuan, Project Save Tlawng-ten solar park siam tura ruahmanna chhehvelte khuarelin a chhiatpui loh nan enviromental clearance atana ṭul leh pawimawhte ti vek a, dan bawhchhe loa hmalak an duh thu an sawi chungchangah, "Solar park siam tur hi rawt mek (proposal stage) chauh a la ni a, solar park siam tura hmalaknaah hian dan leh hrai kim taka zawm thlapin hma lak a ni dawn," a ti.

HPC Vice Chairman hian Inrinni vek khan HPC conference hall-ah Lunglei Electric Veng khelmual zauh leh thawmṭhat dan tur LMC hotute leh khawtlang hruaitute a sawipui a; Electric Veng khelmual hi a hmunah kal chilhin an enho nghal a ni.