HM-in ruihhlo do kawnga ṭanhopui zelah kohhran leh tlawmngai pawlte a sawm

Home minister K Sapdanga chuan October 19, Inrinnia Tuirial bial chhunga police out post hrang hrang a tlawhnaah ruihhlo do kawnga ṭanho zel puiah kohhran leh tlawmngai pawlte a sawm.

K Sapdanga chuan ruihhlo avangin chhungkaw tam tak an ṭap tih sawiin, "Mizoram hi ruihhlo tawlhna kawngpui pakhat a ni a, hei hi sorkar thar chuan a ngaimawh tak zet. Central YMA pawhin theihtawp a chhuahin, ruihlo do kawngah hma a la mek a ni. Sorkarin a chhinchhiah bikah, kumin chhunga ruihhlo mân ringawt pawh cheng vaibelchhe 160 chuang man a ni tawh," a ti.

Tun ang zela Mizo ṭhalai, a bikin mipate ruihhlo bawiha an tan chhoh chuan Mizo hnam hi a ral zawngin a kal zel ang tih a hlauhthawnawm thu sawiin Home Minister chuan, "Tlawmngai pawlte, kohhran leh kohhran ṭhalaite, tumah inthlahdah loa ṭangho zel turin ka sawm che u a ni. A bikin chhungkaw nu leh paten mahni chhungkua ṭheuh uap lum thar leh i la, chhungkaw inrelbawlna fel hi kan ram hian a mamawh hle," a ti a, ṭan la thar leh turin Mizo mipuite a sawm.