Ngopa Ṭhalaiin an bialtu thlavang an hauh; AR-te'n loneitute check tawh lo se an duh

Ngopa Ṭhalai Pawl chuan thuchhuah siamin, an bialtu MLA F Rodingliana, minister of state chunga Assam Rifle-te chetdan an dem thu leh Assam Rifle-te'n loneitute feh tur lo check tawh lo se an duh thu an tarlang.

Lengteng Bialtu MLA hian October 9 - 15 chhungin a bial chhung khaw hrang hrang a tlawh tih tarlangin Ngopa Ṭhalai Pawl chuan, "Assam Rifle-te hian ṭul miah loah ṭum eng emaw zat an lo tiding a ni. Kawlbema thil thleng aṭangin Assam Rifle-te hian minister hi tihbuai an tum niin a lang," an ti.

Ngopa Ṭhalai Pawl chuan Mizoram chu rambuai a ni lo tih tarlangin, "Assam Rifle-te thil tih kha pawm har kan ti," an ti a, Mizoram chu rambuai a nih loh avangin Assam Rifle-te hi tihluihna hmanga mi lo check thei pawh an ni lo tih an tarlang.

Ngopa chhim lam leh hmar lama 2nd Bn. Assam Rifles duty-te chu loneitute feh tur lo check lo tura an duh thu tarlangin Ngopa Ṭhalai Pawl chuan, "Mipuite himna aiin harsatna an thlen zawk," an ti bawk.