KHAWTHLIR

Thisen unit 247 pe

October 19, Inrinni khan pawl hrang hrangin thisen unit 247 an pe. Tuikhuahtlang branch KṬP-in ZMC tan unit 42, Kolasib Town PYD (NEI)-in Kolasib district hospital tan unit 34, Paithar Pastor Bial Ṭhalai Pawl-in unit 47, IKK Ṭhalaiin Civil Hospital Aizawl (CHA)-ah unit 49, Chhinga veng KṬP-in CHA-ah unit 40 leh College Veng branch KṬP-in Synod Hospital-ah unit 35 an pe a ni.

Postal Ballot

Aizawl District Election Officer chuan November 5, 2024-a Sinlung Hills Council general election neih turah official duty avanga postal ballot hmanga vote thlak turte tan form-20 hmangin postal ballot dilna thehluh theih a nih thu a tarlang a, "October 23, 2024 hian Darlawn BDO Office-ah Postal Ballot Facilitation Centre hawn tur a ni a, hemi ni hian postal ballot hmanga vote thlak tur a ni," a ti.

Jubilee hmanpui

Young Mizo Association (YMA), Pukpui Branch chuan October 19, Inrinni khan Lunglei Pukpui YMA Hall-ah golden jubilee an lawm a; Lunglei High Powered Committee (HPC) vice chairman V Malsawmtluanga'n hmanpuiin, YMA Pukpuiin sound system an tuak mek chu jubilee lawmna pualin sum faia ṭanpuina a hlan tur thu a puang. Tlai lamah jubilee lawmna ruai an kilho a ni.

YMA-in luidungah hun an hmang

Fisheries department leh Central YMA-in luidung humhalh tura inremna an siam bawhzuiin October 19, Inrinni khan Saitual Sub. Headquarters Joint YMA chuan Tuivawl Phullen kaia luidung an humhalhna hmunah closed season awareness hun an hmang. Closed season hun chhung hian luia sangha leh nungchate man, tihhlum, an chenna leh nunphung tihbuai khap a ni.

Minister-in tlawh

Kawnpui leh Sairang inkar kawng chhe lai siamṭhat hna thawh mek chu October 19, Inrinni khan Home minister K Sapdanga'n a tlawh a, hnathawktute chu chak lehzuala hnathawh dan tur a sawipui.