Khua/veng 303-ah Congress chak MNF 165; ZNP 6; BJP 5; Independent 48

Mizoram district paruka village council leh Aizawl khawpuia local council inthlana vote tlate hriat kim a la ni lo a; hriat theih chinah Indian National Congress-in VC leh LC 303-ah hnehna an chang a, MNF party-in VC leh LC 165-ah hnehna an chang thung.

State Election Commission aṭanga thudawn danin Aizawl khawpuia local council 83 zinga 82-ah inthlan neih a ni a, pakhatah inthlan ngai loin independent candidate-te an tling sa a ni.
LC 82-ah INC-in LC 39-ah hnehna an chang a, seat 254 an la. MNF party-in LC 38-ah hnehna an chang a, seat 239 an la a; LC dang pakhat, Chaltlangah MNF leh MPC thawhhoin hnehna an chang.
Local council-ah hian ZNP-in seat 16 lain, majority an nei lo a; MPC pawhin majority nei lo chungin seat 10 an la a, mahse MNF nen thawkhoin Chaltlangah an chak thung.
Independent candidate-te'n majority an channa LC pahnih - Mission Vengthlang leh Tui­thiang an awm a, chungah chuan seat15 an la. Chak bik awm lohna LC pathum a awm bawk.
District paruka V/C in­thlana hriat theih chinah INC-in V/C 264-ah hnehna an chang a, MNF-in V/C 127-ah hnehna an chang. ZNP-in V/C parukah hnehna changin, BJP-in V/C pali-ah hnehna an chang a; independent candidate-te chakna V/C 44 leh chak bik awm lohna V/C 42 a awm bawk.
VC leh LC dinhmun belh­khawmin, INC-in khua/veng 303-ah hnehna an chang a, MNF-in 165-ah hnehna an chang. ZNP-in khaw parukah leh BJP-in khaw panga-ah hnehna an chang a; independent-te chakna 48 leh chak bik awm lohna 49 a awm. Party ṭangrual (MNF+MPC) chakna pakhat a awm bawk.
Aizawl district-a VC 95 zinga VC 70-ah inthlan a ni a, result a hriat kim tawh. INC-in VC 29 lain, MNF-in VC 26 an la a, ZNP leh BJP-te khaw pakhat ve veah an chak a; khaw parukah independent-te chakin, chak bik awm lohna khaw pasarih a awm.
Mamit district-ah chuan VC 87 zinga VC 84-te result a hriat tawh a, INC-in VC 47, MNF-in 26, BJP-in pakhat leh independent-in paruk an la tawh a; chak bik awm lohna khaw pali a awm.
Kolasib district-ah chuan VC 52 zinga 46-ah inthlan a ni a, VC parukah inthlan theih a ni lo. Inthlanna khuaah result hriat kim a ni tawh a; INC-in VC 23, MNF-in pariat, ZNP-in pahnih, independent-in panga lain, VC pasarihah chak bik an awm lo.
Champhai district-a VC 108-te result hriat kim a ni a, INC-in VC 66, MNF-in 20 leh independent-in 11 lain, chak awm lohna VC pakua a awm.
Hetih lai hian, Khawzawl-I ah chuan inthlan an boycott avangin inthlan theih a ni lo a; Mimbungah nimin khan an inthlang ṭha bawk a, result kan hre hman lo.
Serchhip district-ah VC 49-a inthlan result a kim tawh a; INC-in VC 29, MNF-in 13, ZNP-in pahnih leh independent-in pakhat an la a, chak awm lohna khaw pali a awm.
Lunglei district-a VC 145-a inthlanna neih zingah VC 137 result hriat a ni tawh a; INC-in VC 70, MNF-in 34, ZNP-in pakhat, BJP-in pahnih, independent-in 15 an la a, chak bik awm lohna VC 15 a awm bawk.