KHAWTHLIR

Law secretary thar

Aizawl District & Sessions judge R Thanga chu Law & Judicial secretary atan ruat a ni a, nimin khan a hna thar hi a zawm. R Thanga hi Aizawla sub-divisional magistrate (judicial) hna a thawh hnuah Gauhati High Court, Aizawl Bench-ah a thawk a, registrar hna a thawh mek laiin Law & Judicial secretary atan ruat a ni a; P Chakraborty a thlak a ni.

NLUP sawiho
Champhaia NLUP line department-te chu nimin khan DC H Lal­engmawia hoin DC con­ference hall-ah an ṭhukhawm a, NLUP line department hmalaknaah media-te nena thawhhona ṭha zawk neih dan tur thu an sawiho. H Lalengmawia chuan, NLUP kaltlanga hlawh­tlinna changte leh en­tawntlakte mi dang entawn tura media kaltlanga tarlan a pawimawh thu a sawi.

Cadet Congress
Salvation Army, India Eastern Territory hnuaia Corps Cadet Congress chu nizan khan Champhai Town Hall-ah A ṭan a ni. Corps Cadet Congress-ah hian nizan khan praise concert neih a ni a, vawiin leh Pathianniah chhunzawm tur niin, Pathianniah a ṭiak ang. Inkhawmpuiah hian Mizoram chhung leh páwn aṭangin corps cadet zirlaite an fuan khawm a, nimin chawhnu thleng khan mi 1,296 an kal tawh a ni.

Minister hmu
MZP chuan thu­chhuah siamin, tun hnai khan zirtirtu indaih loh chung­chang School Edu­cation minister H Rohluna an sawipui tih an tarlang a; minister Rohluna hian zirtirtu indaih lohna sikul zawng zawngte chu a rang thei ang bera hnawhkhat tura hmalak a nih dawn thu a lo hrilh niin an sawi.