Congress, MNF leh ZNP an lawm

Congress, MNF leh ZNP-te chuan thuchhuah siamin April 30, 2015-a village council leh local council inthlan neih zawh taka an party-in seat an lak zatah an lungawi thu an an tarlang.

MPCC chuan, kum 2012-a local council inthlan nena khaikhinin, tun ṭum local council inthlanah hian LC 10-ah hnehna an chan belh tih sawiin, “Hei hi hmasawnna ropui leh hlu tak a ni. Aizawl khawpui leh Mizoram hmun khaw tina Congress party tana ṭha­hnemngai taka thawktute leh Congress party vote tute zawng zawng chungah lawmthu kan sawi e,” an ti.

MPCC hian kum 2012 local council inthlanah LC 29-ah sorkarna an siam a, tun ṭumah hian LC 39-ah sorkarna an siam a ni.

MNF party chuan, “Result kimchang hriat la harsa deuh mah se, Congress sorkar vung vanglai tak, kum li dáwn hun an la nei chung pawha hetiang zat result duhawm tak kan nei thei hi lawmawm kan ti hle. MNF thawhpui ZNP leh MPC-a thlantlinte pawh kan lawmpui a ni,” an ti a; candidate tling zo lote an tawrhpui thu an sawi.

Result an hriat theih chin­ah hmasawn an intih thu sawiin MNF chuan, “A bikin thingtlang lamah NLUP hmang­a vauna kawng hrang hrang hmachhawn ngam a, MNF leh a thawhpuite an tling tam hle mai hi a lawm­awm tak zet a ni,” an ti.

ZNP chuan, VC leh LC inthlanah party dangte’n an member neih zat an hloh ṭhen tih sawiin, “ZNP chuan inthlan hmasa aiin member a leta tama hmasawnna a nei hi lawmawm kan ti. Vawi khatmah sorkarna la chang ve lo chunga 2013 MLA inthlanah, inthlan hmasa aia voter sing chuanga kan pung tak avang pawh hian kan lawm hle,” an ti a; ZNP ticket-a ding zawng zawng leh anmahni vote-tute hnenah lawmthu an sawi a ni.