Dàn loa sumdawng hnam dangte laka Hma la turin NGO-te'n sorkar phùt

NGO Coordination Committee chu nimin khan Central YMA Committee Room-ah an ṭhukhawm a; sorkar kaihhruaina hnuaia hnam dang dan loa sumdawngte lakah May 2015 chhung ngeia sorkarin hma a lak loh chuan a ṭul anga hmalak dan ngaihtuah ni se, an ti.

NGO Coordination Committee-te chuan Mizorama hnam dang dan loa sumdawng leh Mizo hming hawha hnam dang sumdawng tam lutuk an ngaimawh thu sawiin, “MZP-te’n hnam dang dan loa sumdawng an awm lohna tura hma an lakna hi kan thlawp tlat a ni,” an ti.

Home department-in hnam dang dan loa sumdawngte laka mahni kut zála hma la lo tura NGO-te a ngen ang ngeiin sorkarin hma a lak an phût tlat thu an sawi.

JERC (M&M) buatsaih public hearing-a electric chhit man tisang lo tura ngenna tihlawhtling loin, electric chhit man (variable charge 2.63% leh fixed charge 20%) tihsan a nih tho thu an sawi a; electric hman man tihsan chu May 2015 chhung ngeia sût leh turin JERC leh sorkar an ngen a ni.

NGO Coordination Committee chuan, “P&E department hi mipui tana chhawrnahawm zawk a nih theihna atan corporation-a let turin sorkara kan lo thlen tawh angin thlen nawn leh ṭha kan ti. A ṭul anga bawhzui turin NGO hrang hrangte lo inring lâwk tura hriattir a ni,” an ti.

NGO Coordination Committee-ah hian YMA, MUP, MHIP, MZP, MSU, AMFU, MCU leh PRISM-te an tel a ni.