CM-in sorkar dodal ringawt tha a ti lo Duhsak bik nei minister-te sim turin a chah

Chief minister Lal Thanhawl­a chuan kohhran leh NGO-te'n sorkar hmalakna kalpui tak tak a nih hmaa an dodal ṭhin chu an tih tur a ni em, tih ngaihtuah a ṭul thu a sawi. CM hian minister zingah duhsak bik nei an awm chuan sim turin a chah bawk.

Chief Minister hian nimin khan Congress Bhavan-a inkhawmah thu sawiin, "Sawisel bo leh fel famkim kan ni lo tih hre chungin, hmasawnna turin árkhawthimdài loin kan kal zel. Hmasawnna tura kan kalnaah tih fuh tam tak kan nei a, tih fuh lo palh pawh a awm thei a, engamah hmaa sorkar hmalakna dodal ngawt hi kohhran leh NGO-te tih tur a ni em tih ngaihtuah a ṭul. Roreltute hi an dik loh chuan sawisel thiang an ni a, mahse, kohhran chuan kohhran tih âwm takin, NGO pawhin NGO tih âwm takin an ti tur a ni," a ti.

Political party-te chuan kawng hrang hrangin sorkar chu bei mah se, âwm a tih thu sawiin Lal Thanhawla chuan, "Ti lo tura kan ngaihte pawhin political party ang maiin sorkar an bei a ni," a ti a; sorkar dodal chu changkanna emaw ti an awm taa a hriat thu a sawi.

Chief Minister chuan, minister zingah mahni chhungkhat leh laina hnaite duhsak bik an awm thei tih sawiin, "Kan minister zing­ah duhsak bik nei an awm chuan sim se a ṭha ang. Zoram pum tana thlan tlin kan ni a, kan bial lo pawh bial dang 39 a awm tih hriat tur. Kan bulah tlatlum bik an awm tur a ni lo a, tlatlum lo bik pawh an awm a thiang lo," a ti.

Lal Thanhawla sawi danin, tunlai hian politician dah hniam tumna a sang telh telh emaw tih turin politician-te sawiselna a tam. Khawvel a awm chhunga rorelna dik leh fel a awm theihna atan politics chu duan a ni a, ni tin nun leh ei leh bar thleng ngawng a ni. Ramin hma a sawn dawn chuan tlawmngai pawl, kohhran leh sorkar ṭanho a ṭul a ni.

Mizoram sum dinhmun a ṭhat loh thu sawiin Chief Minister chuan, "Mualpho loin engtin nge kan awm ang tih hi kan ngaihtuah ber a ni. Sum enkawl thiam loahte ṭhenkhat chuan min puh a, mi pangngai tan chuan sum enkawl thiam loh tham a awm lo. Kan sum dawnte hi a hmanna tur a awm sa zel. A buaithlak ber chu kihhnawk thenfai tur a tam lutuk hi a ni," a ti.

MPCC president Lal Than­hawl­a chuan an party chuan kil tinah beih a tâwk tih sawiin, "Min puhnate hi V/C inthlan result hian a tireh chiang khawp mai. Inpuhmawhna phuahchawp mai mai hi tumahin engahmah an ngai lo. V/C inthlan hi opposition party-te sorkar bûkna ang hialin an sawi a ni," a ti a; V/C inthlan chu sorkar bûkna a nih tak tak chuan an party tan chuan result lawmawm tak a nih thu a sawi.

CM thusawi Ṭhenkhatte:

Minister zingah duhsak bik nei an awm thei

Political party ni lo poltical party ang maia sorkar bei an awm

MLA-te hi ram pum atana thlan tlin kan ni

Sum enkawl thiam loh tham a awm lo

V/C inthlan result hi kan party tan a lawmawm