Chawlhtirte ruai turin Sum a awm lo: CM

Chief minister Lal Than­hawla chuan, RMSA hnuaia thawk leh Environment & Forest department-a thawk ṭhenkhat, sorkarin tun hnaia a bàn takte chu sorkarin a mamawh takzet tih a sawi a, chutih rualin, "Sum a awm ngang lo," a ti. Hetih lai hian, RMSA hnuaia thawk ṭhin bàn takte chuan chaw an la nghei zel.

Lal Thanhawla chuan, "An tel lo chuan a buai­thlak dawn tih kan chiang. Mahse, sum a ngaih tam avangin tihngaihna a awm ngang lo," a ti a; sorkarin a lainat tak zet thu a sawi.

Tarlan tawh angin, forester leh forest guard-te chuan thuchhuah siam­in, an hna thawhtir leh turin sorkar an ngen a ni.

RMSA-a laboratory technician leh clerk-te pawhin an hna thawhtir leh tura sorkar phûtin April 27, 2015 aṭang khan PRISM office-ah chaw an nghei a, nimin thleng khan an la nghei zel a ni.

Chaw ngheite zinga mi, R Lalnunzira'n Vang­laini palai a hrilh danin, chaw ngheite hi doctor-te chuan drip khai vek turin an ti a, mahse niminah chuan mi 10 an khaisak.