Vanglaini zirchianna HSLC result kum dang nen khaikhinna
HSLC exam beitu zingah hian mipa aiin hmeichhia an tam zawk zel a, pass zingah pawh mipa aiin hmeichhia an tam ṭhin zawk a ni. Pass percentage-ah erawh chuan mipa pass percentage hi a ṭha zawk zel thung.
Distinction, 1st Division leh 2nd Division-ah chuan kum thum chhung (2013-15) hian mipa aiin hmeichhia pass an tam zawk vek a, 3rd Divsion-a pass zingah mipa an tam zawk vek thung. Kum 2013 khan distinction-ah hmeichhia 195 leh mipa 179 an pass a, 2014 ah chuan hmeichhia 229 leh mipa 200 te distinction-ah an pass a ni. Kumin hian hmeichhia distinction-a pass zat chu 298 an ni a, mipa 297 an ni thung.
Kumin hian kum danga awm ngailo private-a exam zingah distinction-a pass pakhat a awm a, 1st division-a pass 24, 2nd division a pass 229 leh 3rd division-a pass 1287 an awm bawk.
Top 10
MBSE in HSLC result a tihchhuah ṭhinah kum 2013-15 chhung khan top 10-ah mipa 23 an lang a, hmeichhia 22 an lang thung. Heng zinga 18-te hi Aizawl khaw pawn sikula zirlai an ni a, zirlai 27-te chu Aizawl khaw chhung sikul hrang hranga mite an ni.
St. Pauls Higher Secondary School leh Baptist Higher Secondary School, Serkawn-te'n kum thum chhung hian top ten a lang pha zirlai an nei ziah a; 2013-15 inkara St. Pauls HSS aṭanga HSLC-a top 10-a zirlai lang zat hi 19 an ni a, Baptist HSS ten top 10-a langpha zirlai an neih zat chu panga a ni.
Kum 2013-ah mi 16 top 10-ah an lang a, mipa leh hmechhia pariat ve ve an ni. Kum 2014 ah chuan top ten-ah hian mi 19 langin, hmeichhia 12 leh mipa pasarih top 10-ah hian an lang a ni. Kuminah top ten-ah mi 10 chiah langin, mipa pariat leh hmeichhe pahnih an ni.
Mark hmu ṭhate
Kum thum chhung (2013-15) khan subject hrang hranga marks hmu ṭha ber ber te zingah mipa 18 leh hmeichhia 20 an lang. Heng zingah hian 28-te chu Aizawl khaw chhung sikula zirlaite an ni a, 10-te chu Aizawl khawpawn zirlaite an ni.
Year Male Female Aizawl Aizawl pawn
2013 5 6 7 4
2014 6 9 12 3
2015 7 5 9 3
100% passed schools
A kum telin zirlai exam zinga zaa za pass-na school a pung zel a, hetihlai hian kum 2013 leh 2014 lama zaa za (100%) pass-na school pahnih St.Pauls HSS leh Mount Carmel School-te chuan kum 2015 hian an zirlai pakhat ve ve te chuan hlawhtlinna an chang zo lo (i.e 99%) a ni.
Kum 2013 khan sikul 81-ah zirlai zawng zawng an passed vek a, heng sikul zinga 52 chu Aizawl pawn an ni. Kum 2014 ah 100% passed-na sikul 154 a awm a, sikul 113 chu Aizawl pawna awm a ni. Kuminah sikul 158 ah zirlai zawng zawng an passed vek a, 100% passed na sikul zinga 123 chu Aizawl khaw pawn lam an ni.
100% failed schools
Kumin hian school 15 zette chuan zirlai pass pakhatmah an nei lo a, heng zingah hian sorkar school paruk an tel. Kum hmasa lama 100% failed school zingah Selam High School chu kumin hian 100% an failed leh a ni.
Zirlai zawng zawng an failed vekna sikul hi kum 2013-ah 18, 2014-ah pariat leh 2015-ah 15 an awm.
