Buhfai supply-ah dik lo a awm lo: MPYCC

Congress ṭhalaite chuan thuchhuah siamin, MNYF-in July 30, 2016-a an press conference-ah, buhfai supply kalpui dan a dik loh vangin Mizoram sorkarin harsatna a tâwk mek nia an sawi chu thu belhchian dâwl lo niin an tarlang a, "Buhfai supply danah dik lo a awm lo a, Mizoramin harsatna kan tâwk dawn lo," an ti.

MPYCC chuan, buhfaiah harsatna a awm loh nan leh fûrpui thlen hma avangin harsatna a awm loh nan Supply Minister-in Central sorkarah thla li chhung daih tur buhfai pek lâwk a dil angin hmuh a nih thu an sawi a; "Buhfai supply danah mimal duhsak bik a awm thei lo a, supply turin tender chhuah a ni," an ti a; Chief Secretary kaihhruaina hnuaiah State Purchase Advisory Board (SPAB)-in a chháng hniam ber hnenah a pe ṭhin niin an sawi.

Congress ṭhalai chuan, "Tuna chháng hniam bertu hian duh anga a supply chak loh avangin sorkarin Chief Secretary chairman-na hnuaiah buhfai rate a bituk a, chu chu quintal khatah Rs. 2,500 a ni. Chu chu mimal hnenah pe tawh loin, sorkar agency MIZOFED hnenah dan ang thlapin supply order pe turin ruahmanna siam a ni," an ti.

Retailer-te'n ration card lem an nei nia MNYF-in an sawi chu Mizoram sorkarin a hriatpui lo tih sawiin, MPYCC chuan, "Ration card lem nei an hria a nih chuan sorkarah report turin kan ngen a ni," an ti bawk.