Thenzawlah YMA-in chhungkaw 4 an ensan

Thenzawl Branch-1 YMA chuan an veng chhunga chhungkaw pali chu ruihhlo an zawrh ṭhin an sim duh loh avangin chhiatni fund an pek tawh an pe kîr a, chhungkaw palia mi pariat tana YMA membership fee an pek tawh pawh an pe kir nghal.

Thenzawl aṭanga thu dawn danin, YMA kumpuan 'Ram leh hnam humhalh' kawnga hmalakna kal zelah, Thenzawl YMA Branch-1 chuan an huam chhungah ruihhlo do beihpui an thlak mek a; ruihhlo zuar ṭhinte chu sim tura ṭum eng emaw zat an ngen hnuah pawh an sim loh avangin chhungkaw pali chu chhiatni fund Rs. 300 ṭheuh an pek kîr bakah, YMA membership fee an khawn tawh pawh an pe lêt a ni.

Thenzawl Branch-1 YMA-te hian tun hnai khan Thenzawl police-te nen ṭanghoin an huam chhunga mimal huana ganja kungte suat hnatlang an nei a; hmun 14-a ganja kûng puitling 50 vel leh la puitling loa ngaih tam tham tak an suat a ni. Ganja kûngte chu an hâl ral nghal.