Kolasib NGO-te'n Chief Minister hnenah Khawtlang mamawhte an thlen

Kolasib All NGO Co-ordination Committee hruaitute chuan, nimin khan chief minister Lal Thanhawla leh minister dangte an pisaah an hmu a, Kolasib khawtlang mamawh hrang hrang an thlen.

Kolasib NGO-te chuan Chief Minister hnen-ah hian ṭum eng emaw zat an lo thlen tawh, CZ Higher Secondary School chu provicialise turin an ngen nawn leh a; Chief Minister chuan sor-karin sum a neih rih loh thu leh, an ti dawn a nih chuan a hmasa berah an tih tur thu a lo hrilh.

CM Lal Thanhawla'n a lo râwn angin Kolasib NGO-te chuan School Education minister H Rohluna an kâwm nghal a; H Rohluna chuan sor-kar sikul siam thar chu an rilrûk tawh loh thu leh CM pawhin Kolasib district-ah sorkar HSS pakhat tal a awm chu a duh tih a lo hrilh.

School Education Minister chuan, tun dinhmunah sorkar sum indaih lohna avangin CZ HSS chu sorkarin a lak theih rih loh thu leh kum thar lamah an ngaih pawimawh hmasak ber tur thu a sawi.

Kolasib NGO hruaitute chuan Rengtekawn-Zero Point inkar kawng siam chungchang pawh PWD changtu Chief Minister hnenah an thlen a; hemi chungchangah hian Chief Minister puitu minister Lal Thanzara chuan, kawng chu NABARD sum hmanga siam turin ruahman ni tawh mah se, kuminah an khawih hman tawh loh avangin kawng danga siam dan an lo zawn tur thu a sawi.

Kolasib District Hospital tihchangtlun dan tur chungchangah Health minister Lal Thanzara chuan, Kolasib damdawi-in chu Mizorama dam-dawi-in zingah doctor nei ṭha pawl tak an nih thu a lo hrilh a; an la neih loh naupang lam thiam bik, Dr Lalrintluangi an dah dawn thu a sawi. Mit doctor erawh hotute'n nen an lo sawiho tur thu a hrilh.

Sports minister Zo-dintluanga pawh a pisaah kawmin, Kolasib NGO hruaitute chuan, Kolasib Venglai khelmuala sports stadium sak hna chawlhsan chu a rang lama chhunzawm turin an ngen. Minister chuan, Central aṭangin sum a rawn kal loh avangin hnathawh chawlhsan rih a nih thu a sawi.

Kolasib All NGO Coordination Committee hruaitute hi an chairman C Liankunga hoin, MUP, MHIP, MSU leh MZP hruaitute nen an kal a ni.