Larsap-in sorkar mi pawimawhte kâwm

Governor PS Shreedharan Pillai chuan chawlhkar liam ta chhung khan New Delhi-ah sorkar laipui hotu hrang hrang a kâwm a, Mizoram mamawhte a sawipui.

Larsap hian Union Home minister Amit Shah a kawm­naah, Mizorama All India Institute of Medical Science (AIIMS) din a nih theih nan hma la turin a ngen a; Lengpui Airport tihlen, Lawngtlai leh Bangladesh khawpui Dhaka inkalpawhna kawngpui siam leh, Aizawl-Silchar inkar kawngpui four lane-a siam chungchangte pawh a sawipui.

Indo-Bangladesh inrìna hung (border fencing) hna chak zawka thawh te, Mizorama Indian Institute of Management (IIM) leh Indian Institute of Technology (IIT) din chungchang te, Mizoram chhim tàwpa Zochachhuah khuaa international trade centre din leh India leh Myanmar ramri hrûla venhimna kalpui chung­changa hmalak dan turte a sawipui bawk. Union Civil Aviation minister Hardeep Singh Puri a kawmnaah PS Shreedharan Pillai chuan, Lengpui

Airport leh Delhi inkara direct flight a awm a ṭul thu te, Lengpui Airport aṭanga khawpui dang pan tura thlawhna thlawk chhuak a tlem avanga harsatnate a hrilh a; Lengpui Airport chu international airport-a hlan kai leh chei ṭhat a ṭul tawh thu a sawi.

Hardeep Singh Puri chuan, Mizoram harsatnate chu a hriatthiam thu a sawi a; hun remchang hmasa berah thlawhna neitu company-te a sawipui tur thu a lo hrilh a ni.