Khawpui tihhmasawnna tura duan AMRUT kalpui tan tura hawn a ni

Sorkar laipuiin khawpui hmasawnna tura a duan, Atal Mission for Rejuvenation and Urban Transformation (AMRUT) chu Aizawl khawpuia kalpui turin nimin khan IPR auditorium-ah Urban Development & Poverty Alleviation (UDPA) minister Zodintluanga'n a hawng.

AMRUT hawnna inkhawm hi UDPA secretary Dr C Vanlalramsanga'n a kaihruai a; Zodintluanga chuan, sorkar laipuiin khawpui tihhmasawn nan programme panga a duan thu sawiin, "Khawpui hi hmasawnna bulpui a nih avangin 'Engine of Growth' tih a ni. India pawhin khawpui tihhmasawn ngai pawimawhin programme pawimawh tak tak panga a kalpui a ni," a ti.

Central programme hmanga khawpui tihhmsawn chu sorkar mawhphurhna a ni tih sawiin UDPA Minister chuan, "AMRUT kalpui tur hian inbuatsaih fel a ni tawh," a ti a; AMRUT kalpui tur hian PWD, PHE leh AMC-te thlan an nih thu a sawi.

Zodintluanga chuan, sorkar laipui programme Housing for All hnuaiah induhsakna a awm dawn lo tih sawiin, "Beneficiary turin tute emaw paih a, tute emaw thun tur a ni lo. In mamawhte tana duan a ni a, a mamawh zawng zawng cover tum a ni," a ti.

Project hlawhtling taka kalpui turin department leh AMC-te'n an hmalakna tur
ṭheuhah ṭan an lak a pawimawh tur thu sawiin, Minister chuan, "Project hi ṭha tak leh chak taka kan kalpui a, utilisation certifcate-te kan thehluh zung zung theih chuan instalment an rawn pe chhuak chakin ka ring," a ti a; kum 2015-16 leh 2016-17 atan first instalment pek chhuah a nih tawh thu a sawi.

Parliamentary secretary (UDPA) Hming-dailova Khiangte leh AMC mayor PC Lalhmingthanga te pawhin thu an sawi a; PHE leh AMC hotute'n AMRUT kalpui tura ruahmanna hrang hrang an siamte a lem nen an sawifiah.

Ministry of Urban Development (MUD) chuan India ram khawpui tihhmasawn tura a thlan khawpui 500 zingah Aizawl a tel a, hna thawh nan kum 2015-16 atan cheng vbc. 41.687 a ruahman a ni.

Cheng vbc. 41.687 aṭanga sorkar laipui tum tur chu vbc. 36.5 a ni a, state tum tur chu vbc. 4.057 a ni a; cheng vbc. 1.13 chu inrêlbàwlna leh pisa mamawh atan dah a ni.

Kum 2016-17 atan pawh cheng vbc. 47.79 ruahman a ni tawh a, hei bakah hian mission kalpui chhungin kum tin cheng vbc. 45 hmuh theih beisei a ni.

AMRUT hnuaiah hian tui in tur thiang-hlim pek, zun leh ek thlî sâwngbâwlna, tuihâwk luankawr siam, khawpui chhunga inkalpawhna siam leh green/space park siam hnate thawh a ni dawn.

Water supply leh septage management & bio digester chu PHE-in an thawk dawn a; drainage chu PWD leh PHE inkawpin an thawk ang a, urban transport leh green space park chu AMC-in an thawk thung ang.

AMRUT-a sum sem dan

(Rupees in crore)

Sector Central State Total

share share

Water supply 3.65 0.40 4.05

Septage management 3.65 0.40 4.05

& Bio Digester

Drainage 23.36 2.59 25.59

Urban transport 4.92 0.54 5.47

Green & space park 0.91 0.10 1.01

Administration & office 1.13 Nil 1.13