Táng tlanbo man kawngah Police pui turin mipui ngen

Mizoram police-te chuan thuchhuah siamin, July 9, 2016 zing dar 8:30 vela Central Jail aṭanga tlanbo Lalrindika (26) s/o Vanlalchhunga, West Lungdar, Mamit district chu man tumin theihtawp an chhuah tih an tarlang a; a ṭul apianga police ṭawiawm turin mipui an ngen.

Police tarlan danin, Lal-rindika hi January 31, 2016 zana an khuaa tual-thah thubuaia táng a ni a; ft. 5.5-a sang, ngo lam, a bán vei lama tattoo nei, a mithmul vei lam chunga ser nei a ni. Central Jail aṭanga a tlanbo vang hian tualthah thubuai a neih sa bakah, jail aṭanga tlanbo thubuai an siam belhsak a ni.

Police thuchhuah chuan, "Lalrindika man a nih theih nan theihtawp chhuahin beihpui kan thlak mek a, mi tinte fimkhur tur leh man a nih leh theihna tura police-te ṭanpui turin kan ngen a ni," an ti a; a awmna chin hria emaw, lo hmu emawte chu police station hnai berah emaw, V/C hnai berah emaw hriattir thuai turin an ngen.