World Breastfeeding Week rualin Mother's Absolute Affection prog hawng

August 1-7 chhunga hman tur World Breastfeeding Week 2016 chu nimin khan Aizawl Civil Hospital conference hall-ah Health minister Lal Thanzara'n a hawng a; kum khat chhung kalpui tur Mother's Absolute Affection (MAA) programme a hawng nghal.

Health Minister chuan, nu hnute tui chu naute tan chaw ṭha famkim a ni tih sawiin, "A aia ṭha siam chhuah a la ni lo a, an siam chhuah pawh a rinawm loh. Nuin naute tan hnute tui aia hlu pek tur a nei chuang lo a, a man a awm lo a, Pathian thil thlâwn pek a ni," a ti a; naute châwm nan thil dang zawng aiin nu hnute tui chu a tláwm zawk tih a sawi.

Lal Thanzara chuan, naute hnena nu hnute tui pek ṭhat chu naute tan mai bakah, nu tan pawh a ṭhat thu leh, ram hmasawnna thlenga nghawng thei a nih thu a sawi a, "Sorkarin hnute tui pek pawimawhzia a hria a, thla ruk chhung nu hnute tui chauha châwm a nih theih nan maternity leave (nau neih chawlh) pawh thla rukah tihsei a ni," a ti.

Mother's Absolute Affection (MAA) programme hawn tâk chung-changah Lal Thanzara chuan, "MAA hi 'Nu hmangaihna tluantling' a tih theih ang. Nuin a fate ṭha zawk leh chak zawka a enkawlna kawnga hmalakna tur a ni," a ti a; MAA hnuaia hmalaknaah district ti ṭha bikte hnenah lawmman pek a nih tur thu a sawi.

MAA hi tun thla (August) aṭangin kalpui ṭan a ni a, kum khat chhung, July 2017 thleng kalpui tur a ni.

Lal Thanzara chuan, State Referral Hospital lama Aizawl Civil Hospital (ACH)-a department-te sawn ni mah se, ACH chu sorkarin a hlamchhiah dawn lo tih a sawi a, "Medical college din tum tihpuitlin a nih theih nan ṭan lak zel a ni," a ti. Health department hmalakna leh State Referral Hospital chu eptu party-te pawhin an phûrpui nia sawiin, "Referral Hospital phei chu min tlawhpui reng a, a lawmawm hle a ni," a ti bawk.

Health department chuan hminghliauna nei bawk mah se, an thawk ṭha thawkhat tih a sawi a; Health department-a thawk zawng zawngte chu ṭan la leh zual turin a fuih.

Inkhawma khualzahawm Dr K Ropari, health principal director chuan, United Nations sustainable development goal-ah an luh mek thu sawiin, "Hemi chhungah hian goal 17 a awm a, chung zingah chuan hriselna atana nu hnute tui ngeia naute châwm pawh a tel," a ti.

Chairman Dr K Lalbiakzuala, Hospital & Medical Education director chuan, nu hnute tui pek kawngah Mizoramin tun hnaiah hma a sawn thu leh, India ramah a ti ṭha ber pawl an nih thu a sawi.

Health department chuan, naute tan nu hnute tui chu chaw ṭha ber a nih thu te, thla ruk chhung chu thil dang pe loa nu hnute tui chiah pek a
ṭhat thu te, kum 2 an nih thlengin hnute tuia châwm a ṭhat thute an tarlang.

Kumina World Breastfeeding Week hi a vawi 25-na a ni a, thupui chu 'Breasfeeding: A key to sustainable development' tih a ni.