KHAWTHLIR

Siaha DC

Siaha DC kal chhuak tur R Zarzosanga chuan nimin khan DC thar, Harleen Kaur hnenah DC mawhphurhna a hlan. Thu dawn danin, Punjab-a Hoshiarpur khaw chhuak Harleen Kaur hi 2011 batch IAS a ni a, an batch-ah hian UPSC civil service exam-ah 63-na niin, IAS zawm ta zingah 59-na a ni. Harleen Kaur-i'n a thlak tak R Zarzosanga chuan ATI director hna a chelh ang.

Thilpek hlan

State Bank of India, Lawngtlai branch chuan nimin khan Lawngtlai District Hospital-a hman atan wheelchair leh stretcher trolly pali ve ve an pe. Thilpek hlan inkhawm hi DC conference hall-ah buatsaih a ni a, Lawngtlai DC Dr A Muthamma-in a hmanpui.

Thih belh

July 31, 2016 zana Sangtea, Sihhmui khuain a vuak vanga hliam, Lalramlawma (24), Sihhmui chu August 1 zan dar 10 vel khan Aizawl Civil Hospital-ah a thi. Sangtea hian Lalramlawma leh Zokaia te chu zana an mu lai thingin a vua a, Zokaia hi Thawh-
ṭanni chawhma dar 11 vel khan a thi a, Lalramlawma pawh a hliam tuar loin a thi ve leh a ni.

Eng awm dawn lo

Zuangtuia 33 KV Sub-Station aṭanga Aizawl Power House-a 33KV Indoor Sub-Station-a kawlphetha pekna hruipui chu vawiin hian thlak chhunzawm a nih dawn avangin, tukin zing dar 6-10 inkarah Electric Veng, Chhinga Veng, Dawrpui, Zarkawt, Chanmari, Tuikual South veng
ṭhenkhat, Treasury Square, Chaltlang Dawrkawn leh a chhehvel, Ramhlun PWD Mual leh Laipuitlang-ahte eng pek chhuah theih a ni lo ang..

Thing phun

Kolasib District Scouts and Guides chuan, nimin khan Sussane Downs Boarding School, Khuangpuilamah thing phun beihpui thlakna an hawng a; Kolasib leh Thingdawl inkar kawng sirah thing eng emaw zat an phun nghal.

Tlawng luiah tla

Nimin chawhnu dar 3 vel khan Tlawng luia Nghalchawm kâia Andrew Lalherliana (35) s/o Lalromawia chu lên an dennaah chesualin tuiah a tla a; he thu ziahlai hian Sairang leh Sihhmui khawtlangin a ruang zawng mek.