Kudamah buhfai a awm rei ngai lo : Supply Minister

Food, Civil Supplies & Consumer Affairs minister John Rotluangliana chuan nimin khan Rawpuichhip khuaa Supply Centre a hawng. Minister chuan, kudamah rei tak buhfai a awm ngai tawh loh thu sawiin, "In fairèl bél a khah hmain in kudam a khat ang," a ti.

Supply Minister chuan, kudam ruak lawm-awm ti tlat ṭhin an awm nia sawiin, "Mi ṭhenkhat chu politics-ah an zuang lut a, kudam ruak vanga lawm tlat an awm ṭhin hi a pawi," a ti a; tun dinhmunah Mizoram-ah mipuiin buhfai an dawn loh emaw, an dawnah a chhia emaw a awm lo niin a sawi.

Mizoramah mipuiin buhfai an dawn a pun thu sawiin, John Rotluangliana chuan, "A âwm ang chin chu i ngaihtuah thiam ve ang u. Nau piang hlim kg. 8 ei tur anga kan ti ṭalh pawh hi a mawi lo a ni," a ti a; Congress sorkarin a hlauh ber chu Mizo mipuiin buhfai an nghei a nih thu sawiin, "Buhfai supply-ah hian tun dinhmunah harsatna kan tâwk lo," a ti.

Supply Minister chuan, buhfai supply danah dan bawhchhiatna a awm lo nia sawiin, "Tender kan chhuah a, MIZOFED hi sorkar agency an ni a, thu dik loa tender emaw, dan bawhchhiatna kan nei lo. Eptute hian an ringhlel a nih chuan Court-ah kal rawh se," a ti a; mipui pawisa cheng khatmah a khawih chingpen ngai lo niin a sawi bawk.

FCSCA Minister sawi danin, Rawpui-chhipa Supply kudam hi khaw pasarih chawm-tu tur a ni a, retailer pariatin an la
ṭhin dawn a ni. Kudam hi cheng nuai 52.262 sênga sak niin, buhfai metric ton 350 dah theihna tur a ni.