MJA-in Lungleiah General Body Meeting an nei

Nimin khan Lunglei Press Club-ah MJA General Body Meeting neih a ni a, MJA gen.hqrs. hruaitute leh Lunglei district MJA member-te an tel a, MJA gen.hqrs. secretary C Lalhmachhuana'n a kaihruai.

MJA gen.hqrs. vice presi-dent Zonunsanga Khiangte chuan thu sawiin, MJA chu Mizoram puma hnathawh vanga inchhûng khawm an nih thu a sawi a, "Inrél a, inhua leh insawichhe tawn tur kan ni lo a, thawkhoa ṭangho tur kan ni," a ti. Chanchinbumite chu 'Fourth Estate' tih hiala koh leh vuah ni mah se, an zalênna chu hmansual theih a nih avangin thuchhuah kawngah fimkhur a ṭul thu a sawi.

Lunglei MJA president Lianchama Chhangte pawhin thu sawiin, tunlaiah social media a chak tawh a, thu thar hriat zung zung nan leh information inpek nana
ṭangkai tak ni mah se, duh duh sawi leh in sawisel nana hman a ṭha lo tih a sawi.

Lunglei district MJA-ah hian member 29 an awm a, chung zinga pariat chu Hnahthial Sub-MJA member an ni. Nimina General Body Meeting-ah hian zawhna leh chhanna hun hman a nih bakah, thil pawimawhte inhrilhfiah a ni.