Kuminah March 15 hmain lo hâl tur
State Level Sub-Committee on Fire Prevention chu nimin khan an chairman TJ Lalnuntluanga, Environment, Forest and Climate Change (EFCC) minister hoin Secretariat conference hall-ah an ṭhu khawm a, kumina Fire Prevention Week hman dan tur an sawiho. Kumina lo hâl hun hnuhnung atan March 15 ni se, an ti.
Committee chuan, kumina kângmei vèn hapta, Fire Prevention Week chu February 10-15 chhunga hman turin an rél a; thupui atan 'Kângmei chhuak tur veng la, i ram chhan rawh' tih an thlang. Meeting chuan, district thar pathum - Hnahthial, Saitual, Khawzawl tiamin district tinah kângmei vèn kawnga hmalak dan ṭheuhte tlawmngai pawl hrang hrangte'n enfiah leh se, ram kâng ven kawnga district leh district tina khua (village) ti ṭha pathum ṭheuh hnenah Fire Prevention Award hlan ni se, an ti.
Kângmei chhuah a nih loh nan kângmei vèn pawimawhzia mipui hriatah uar lehzuala puanzar te, chanchinbu leh TV-ah thuchah leh zirtirna tihchhuah te, zirna-inah thuchah chhiar chhhuah te, poster leh banner tàr te, khaw hrang hrangah V/C leh tlawmngai pawlte nen awareness programme hman te, social media hrang hranga thehdarh tur animation siamte an rél bawk. An rorelte chu State Level Fire Prevention Committee-ah pawmpui atan la thlen leh tur a ni. Meeting hian kum 2019 chhunga hmalak dan an thlir lêt nghal a; kângmei vên kawnga district tin hmalakna chu ṭha thawkhat viau mah se, huan leh lo hâl hun bituk zâwm lo an tam thu an tarlang.