Ministry of Finance-ah ADB loan a la fel lo; Health care hmanlai pawhsei leh a ni dawn

Health minister Lalrinpuii chuan health care scheme atana Asian Development Bank (ADB) aṭanga loan pûk tur chu Ministry of Finance-ah tihfel a la nih loh avangin health care scheme thar hman theih a la nih loh thu a sawi a, "Tuna kan hman lai hi pawhsei leh phawt a ni dawn," a ti.

Vanglaini palai zawhna chhangin Health Minister chuan, health care scheme thar (Mizoram Universal Health Care Scheme) hman theih a la ni loh chhan a sawifiah a, "ADB lamin June, 2024-ah agreement kan sign dawn a nia an ti a, an ṭhulh a, chumi hnuah July, September leh October-ah kan sign dawn nia an ti leh," a ti a, mahse vawiin thlengin agreement hi an la sign theih loh thu a sawi.

Health Minister chuan tunhmaa ADB loan atana Ministry of Finance lama tihfel ngaite tihfel vek tawh anga sawi chu thudik a nih loh thu sawiin, "Ministry of Finance lamin an la approved loh avangin agreement hi sign thei lo kan ni. ADB lamin sawifiah ngaite an sawifiah zel a, keini lam pawhin kan umzui reng. Chief Minister DO letter kan ziahtir a, hei hi Ministry of Finance-ah kan pe leh ang," a ti.

Health department lam chu an inpeih vek tawh thu sawiin Lalrinpuii chuan, "Keini lama tih ngai zawng zawng chu kan tifel vek tawh. ADB nena agreement kan ziahfel a, pawisa kan dawn hun hunah Mizoram Universal Health Care Scheme hi kalpui ṭan nghal thuai a ni ang," a ti a, an tum anga health care scheme thar an kalpui lawk theih loh avangin department lam pawhin hrehawm an tih thu a sawi.

Health Minister sawi danin, health care scheme hman mek chu pawhsei leh a ni dawn. Ṭum dangah chuan thla hnih chhung atan pawhsei ṭhin a ni a, tun ṭumah chuan thla nga atan pawhsei a ni ang. Thla nga atana pawhsei a nih tur chhan chu, health care scheme hman hmaa pawhsei a ngaih tawh lohna atan a ni a, thla nga ral hma pawh hian health care scheme thar hman theih a ni mai thei.