P&E Minister leh Assam Rifles boruaka Mizoram sorkar a ngawi reng hi a mak - Leader of Opposition

Leader of opposition Lalchhandama Ralte chuan Power & Electricity Minister leh Assam Rifles boruaka Mizoram sorkar a ngawi reng chu mak a tih thu a sawi.

Nimina MNF-in an pisaa political session an hmanaah MNF vice president Lalchhandama Ralte hian thu sawiin, "Eng ngati nge tun thlenga sorkar a ngawih reng, hlauh an nei em ni? MNF Legislature Party chuan buaina thlen tukah thuchhuah siamin AR-te chet dan kan dem nghal. Congress leh BJP-te pawhin an dem thu an sawi bawk a nih kha," a ti.

Leader of Opposition chuan democracy ram a nih avangin India ramah mipui thlan tlin an lal ber tih sawiin, "Armed Forces (Special Powers) Act, 1958 hmanna ang maia an duhna hmun hmuna check post siam a, 2nd Bn. AR-te'n minister an dang buai hi kan dem tak zet," an ti a, Assam Rifle-te chu ramria duty tur an nih thu a sawi.

Lalchhandama Ralte chuan, thil thleng chu hnam anga ṭanrualna hun atan hman an beisei tih sawiin, "Khawiah nge kan Mizoram sorkar hi? Eng ngati nge vawiin thenga thuchhuah a la neih loh? He hnam humhim tur hian he sorkar hi kan ring zui zel ang em?" a ti.

Minister 12 zinga pakhatin harsatna a tawh laia Chief Minister leh Home Minister an ngawi reng chu mak a tih thu sawiin Lalchhandama Ralte chuan, "Hlauh an ngah ta viau em ni?" a ti a, CM chuan AR hotu lu ber hi a rang a ranga koin, Union Home Ministry thlengin action la turin hma a la nghal tur a nia a ngaih thu a sawi.

MNF Vice President chuan Mizoram leh hnamin chhantu a ngai tih sawiin, "Kha thil thleng kha hnam issue dik tak a ni. P&E Minister kan tawrhpui em em laiin, ZPM sorkar leh an party an ngawi tlat hian ngaihtuah loh tur thil tam tak min ngaihtuahtir phah. Mi ṭhenkhatin AR hmuna party office tur an beisei tihte hi tak tak a nih ka ring ta hial," a ti.

Leader of Opposition chuan thil thleng chu party dangte'n politics thilah an la lo tih sawiin, "Democracy leh mipui dikna chanvo tun din ni rawh se, kan ti mai a ni. An minister leh MLA-te an ngawi tlat hi an party chhungkaw boruak ṭhat loh vang a ni em?" a ti a, ram leh hnam a dinchhuah theih nana theihtawp chhuahpuiah Zoram mipui a sawm nghal bawk.