Naktuk aṭangin sumdawng lirthei ding dawn; Sumdawng lirthei thlawp lo an awm nual
Mizoram Commercial Vehicle Union (MCVU) ten tuialhthei man tihhniam a nih loh avanga lungawi lohna lantirna atana naktuk, October 23 zing dar 6 aṭanga sumdawnna lirthei tlan loh an tum chu sumdawnna lirthei neitu intelkhawm zingah thlawp lo tur an awm nual.
All Mizoram Commercial Tipper Association-Owners & Drivers emergency meeting October 20, Pathiannia neih chuan MCVU hi thlawp ve loh an rel.
All Mizoram Commercial Tipper Association chuan, "Mizorama oil man tihsàn a nih vanga MCVU thu chhuah siam, October 23, 2024 (Nilaini) aṭanga tiam chin awm loa motor din tir an tum hi keini chuan ṭha kan ti lo a, kan thlawp ve dawn lo a ni," an ti.
Eirawngbawlna gas phurtu Mizoram Indane Drivers Welfare pawhin thuchhuah siamin, "MCVU-te'n an motor dintir an tum chungchangah keini chuan Mizo mipuite tana harsatna siamtu nih hi ṭha kan ti lo," an ti a, MCVU-te lungawi lohna lantir tur hi an thlawp ve dawn loh thu an tarlang.
Vanglaini palai zawhna chhangin All Mizoram Petroleum Dealers Association (AMPEDA) president K Lalnghakliana chuan, lungawi lohna lantir tur zingah an tel ve loh thu a sawi a, "An pawlah kan tel loh bakah, sawm pawh kan ni lo. Mi lungawi lohna lantirnaa sawm pawh kan ni lo chunga lo tel ve ngawt chi-ah kan ngai lo," an ti.
Mizoram Taxi Association (MTA) pawhin MCVU-te'n lungawi lohna lantir an tum hi an zawm dawn lo nia thudawn a ni. MTA hian MCVU-in lungawi lohna lantir an tum hmasak ṭumin an zawm dawn loh thu thuchhuah siamin an lo tarlang tawh.