Sumdawng lirthei nawrh avanga mipuiin an tawrh lohna atan ruahmanna siam a ni - Home department

Home department chuan thuchhuah siamin, Mizoram Commercial Vehicle Union (MCVU) in lungawi lohna lantira nawrh huaihawt an tum avanga mipuiin harsatna an tawh lohna atan Mizoram sorkarin ruahmanna a siam thu an tarlang.

Tun hnaiah sorkarin tuialhtheia chhiah tihsan avanga MCVU-in lungawi lohna lantira nawrh huaihawt an tum chungchangah Mizoram sorkar chuan nuar lo turin a duh tih tarlangin Home department chuan, "Sorkarin mipui tana harsatna thlentir lo turin a ngen. Commercial vehicle pawl ṭhenkhatin mipui tana harsatna thleng palh thei hriaa nawrh ve loh an rel chu sorkar chuan lawmawm a ti hle," a ti.

Home department tarlan danin, Mizo-ram sorkar chuan commercial vehicle-te tluang taka an service ngei theihna turin hma a la dawn a; commercial vehicle zinga service duhte an duh anga an service ngei theihna tur pawhin hma a la dawn.

Chhiah tihsan chungchanga mipui nawlpuiin nghet taka ding tura sorkar an ngennaah sorkarin lawmthu a sawi tih tarlangin Home department chuan, "Heng chhiah tlingkhawmte hi mipui hnenah a kir leh vek dawn a, ram hmasawnna tura kawng hrang hranga hman tura duan lawk a ni," an ti.

Home department chuan hetiang a ni chunga MCVU-in nawrh an kalpui tlang dawn a nih pawhin mipuiin an tawrh lohna turin sorkarin theihtawp a chhuah dawn tih tarlangin, "Ruahmanna pawh a siam lawk tawh," an ti a, mipui tana harsatna thlen zawnga hma la lo turin Mizoram sorkar chuan pawl hrang hrangte a ngen tih an tarlang.