K Vanlalvena'n Union Home Minister a kawm

Rajya Sabha MP K Vanlalvena chuan October 19, Inrinni khan New Delhi-ah Union Home minister Amit Shah chu a chenna-inah a kawm a, Assam Rifle-te Zokhawsanga an insawn tur chungchang leh Mizoram mamawh dangte a sawipui.

K Vanlalvena chuan, Aizawl khawpui laili aṭanga Assam Rifle-te Zokhawsanga insawn tura ruahmanna chu kum 1988 aṭanga inṭan a nih thu Amit Shah hi a hrilh a, "Assam Rifles leh mipui inhmuhthiam lohnaah Assam Rifles ten mipui pawisawi lo mi 11 lai an kahhlum avang leh mi tam takin hliam an tawrh avangtein khawpui laili aṭanga AR-te sawn chhuah chu civil mite nena intihbuaina a awm fo lohna tura tih makmawh nia hriain khatih laia chief minister Pu Laldenga khan a ruahman a ni," a ti a, kum 36 ral hnuah pawh an la chhuak lo fo leh nikuma Amit Shah ngei Aizawlah lokala a rawn enfiah tawh hnuah an la insawn lo fo chu mipuite'n an hriatthiam loh thu a sawi.

Act East Policy kalpui mek hnuaia Mizoram chhim lamin tuifinriat a pawhna tur kawngpui sial mek, KMMTTP Road tihpuitlinna tur te, Zokhawthara Indo-Myanmar Border Trade Centre chu awmze nei zawka a kal theih nan security thilah thil pawimawh sorkar laipuiin a tih thar ngai nia a hriatte MP hian Union Home Minister hnenah hian a thlen a; Mizoram Chief Secretary ni lai chu kumin October thla tawpah a pension tawh dawn avangin Mizoram chief secretary atan Mizo hnahthlak zing ami, Mizo ṭawng thiam IAS senior dah a ṭul thute a sawi bawk.