KHAWTHLIR

Thisen pe

DIET, Aizawl NSS Unit chuan October 18, 2024 khan Civil Hospital Aizawl tan thisen unit 88 an pe a, petute mipa 47 leh hmeichhia 41 an ni. Civil Hospital Aizawl Blood Bank-a thawktuten DIET-ah panin thisen hi an laksak a ni.

Ei siamna leh zawrhna endik

Lunglei district-a vantlang tana ei leh in siamna hmunte'n thianghlim leh hrisel taka ei siam leh zawrh an kalpui theih nana thingpui dawr leh ei siamna hmunte endik tura a din joint inspection team chuan nimin khan a ṭum khat nan Lunglei khawpuia thingpui dawr leh restaurant 10 an endik.

Ui khuahkhirh

Lawngtlai DC Cheemala Siva Gopal Reddy chuan Lawngtlai district-ah ui khuahkhirhna thupek a tichhuak a; "Mi tumahin khawlaiah ui an chhuah tur a ni lo a, an chhuah a nih pawhin a neituten chain-a thlungin an kai tur a ni. Khawlaia ui tla leh a nghawnga thlunna awm lote chu a neitu awm lo anga ngaih a ni ang," a ti. Thupek zawm lote chu BNS 2023 Section 223 hmanga hrem an ni dawn.

Kuhva rah phurh khap

Khawzawl district bawrhsap K Vanlalṭhiana chuan Bharatiya Nagarik Suraksha Sangita (BNSS), 2023 Section 163 in thuneihna a pek angin Khawzawl district-ah dan loa kuhva rah phurh a khap a; "Khawzawl district-ah dan loa kuhva rah tawlh ruk phurtute hnen aṭangin danin a phut ang ni lo pawisa lak khap tlat a ni a, Khawzawl district-ah kuhva rah tawlh ruk dah khawlna tur kudam sak khap tlat a ni," a ti.

Delhi-ah training chhunzawm

Junior Grade of Mizoram Secretariat Service Foundation Training 2024 chu August - September chhungin Administrative Traninig Institute, Aizawla neih zawh a nih hnuah nimin aṭang khan Indian Institute of Public Administration (IIPA), New Delhi-ah attachment neiin training chhunzawm a ni a; training-a kalte hi Mizoram sorkara Course director Lalremruati, ATI dy director leh ATI asst. director Daphne Zosangpuii ten an ho. Training hi October 25, 2024 thleng neih a ni ang.