Adviser to CM-in Bana Kaih Scheme a sawifiah; Mi 2,396-te scheme hnuaiah an inziaklut tawh

ZPM chuan nimin khan an pisaah chhung inkhawm an hmang a, thusawitu adviser to chief minister Dr KC Malsawmzauva chuan Bana Kaih Scheme a sawifiah a, Bana Kaih Scheme hnuaiah mi 2,396 an inziahluh tawh thu a sawi.

Dr KC Malsawmzauva chuan Bana Kaih Scheme hnuaiah peng panga a awm tih sawiin, "Chung zinga mipui nawlpuiten kan chhawr ṭangkai tur leh a lian ber ber pahnih chu thlai thar hralh (market handholding) leh eizawnna bul ṭan turte tana loan (entrepreneurship handholding) hi a ni," a ti.

Lalduhoma kaihhruai ZPM chuan kut hnathawktute leh ṭhalai mahni kutkawiha eizawn tum, bulṭanna tura harsatna neite a ngai pawimawh hle tih sawiin Adviser to CM chuan, "Sorkar rilruah chuan market handholding hi kut hnathawktute tana ruahman a ni," a ti a, entrepreneurship handholding chu ṭhalai mahni kutkawiha eizawn tumte bulṭanna tur leh an hmalakna tilian tura sum hlawm mamawhte tana ruahman a nih thu a sawi.

Adviser to CM sawi danin, market handholding hnuaiah kut hnathawktu chhungkaw 36,821 chuang an in ziak lut tawha, entrepreneurship handholding hnuaiah ṭhalai mi 2,396 ten project an thehlut tawh.

Aizawl district aṭangin inziaklut an ṭhahnem ber a, mi 555 inziaklut tawhin, a dawttu Lawngtlai district atangin mi 338 ten project an thehlut tawh a ni.

Diltu ngah ber department chu Commerce & Industry niin dilna 907 a lut tawha, a dawt chu Animal Husbandry & Veterinary niin dilna 821 a lut tawh.

Dr KC Malsawmzauva chuan entrepreneurship handholding chu a bul ṭanna atan bank pathumte nen ṭangkawpa kalpui a ni dawn tih sawiin, "SBI, MRB leh Apex Bank-te nen he project ah hian kan thawkho dawn. Tin, he scheme hnuaiah hian pawl ang leh mimal ang in a in ziahluh theih," a ti.

Adviser to CM chuan Bana Kaih Scheme chu ram siamṭhat tumna project a nih avangin party politics anga kalpui a rem ve lo tih sawiin, "Ṭawngṭaina nen Pathian malsawm tlaka kan kalpui a ngai," a ti a, campaign laia an au hlate hre rengin dik leh thianghlim taka he scheme hi Mizoram hmasawnna atan kalpui a ṭul thu a sawi.